Aizawl: BJP Mizoram-in an party pisa-ah Thawhtanni khan Karthar Inhlanna leh Political Session an nei a, he huna thusawitu, State Vice President JB Rualchhinga chuan central sorkar hmalakna ‘Operation Trident’ avanga ruihhlo leh thil tisualtute dona kawnga rah tha chhuah mek chu fakawm a tih thu leh central hruaitute entirna pawimawh tak a nih thu a sawi.
State General Secretary Lalfakzuala Hauzel kaihhruai inkhawmah hian JB Rualchhinga chuan Union Home Minister Amit Shah huaisenna leh mahni ram chhung himna a ngaihpawihmawhna chu lawmawm a tih thu sawiin, ED, NCB, Mizoram Police leh Assam Rifles-te tang kawpa hma an lakna avangin Mizoram leh India ram pumah ruihhlo hmanga sumdawnna thui tak a ping ta nia a hriat thu a sawi a; tun hnaia heroin hawng 440 case atanga mi 18 man an nih bakah bank account 1,424 lai hrensak an ni chu hmalakna fing leh remhre tak a ni, a ti bawk.
Kristian ram intih mek laia hetiang ruihhlo tawlhruknaa Mizo mi leh sate an lang fo chu chanchin tha hril nen a inhmeh lo hle nia sawiin, hetiang case lian tak hi state sorkar ringawt chuan chhui chhuah rual a nih loh thu leh rawngbawlna lian hi ZPM sorkar hmalakna ni lovin central sorkar hmalakna zawk a nih thu a sawi a, sual do nana ‘Operation Trident’ siamsaktu central sorkar leh Amit Shah hnenah lawmthu a sawi a ni.