Aizawl: EIACP Hub, Mizoram Pollution Control Board (MPCB) leh tourism department tangkawp buatsaih Green Skill Development Training Programme (GSDP) hnuaia ‘Nature Conservator cum Ecotourism Guide’ Certificate Course kharna hun hman a ni a, he huna khuallian Tourism Minister Lalnghinglova Hmar chuan training zo thalai 20-te hnenah GSDP certificate a hlan.
Thawhtannia Aijal Club-a valedictory function-ah hian Lalnghinglova Hmar chuan Environment, Forest and Climate Change (EF&CC)-in Tourism department an thawhpui chu a lawmawm a tih thu sawiin, tourism chu Mizoram pum huap a nih avangin department hrang hrang te nen thawhhona tha neih a tul thu a sawi.
Tourism minister chuan rel kawng leh social media avanga Mizoram tourism thang chho mekin economy tha zawka a siam dawn avangin ramngaw leh nungcha tichereu lo zawnga ecotourism guide-ten mawhphurhna pawimawh an neih thu a sawi a; khualzin hipna a community-based tourism kalpui mek a nih thu sawiin, Krismas chawlh chhung pawha khualzin pawm tura mipuite tanrual a pawimawh thu a sawi.
Tourism Joint Director Lalthakimi Pachuau leh MPCB Member Secretary V. Lalengmawia ten trainees-te fuihna thu an sawi bawk.
Ministry of Environment, Forest and Climate Change (MoEF&CC) leh Skill India Mission tangkawp hmalakna GSDP hnuaia certificate course hi India ram pum pawmpui (NSQF & NCVET approved) niin, kum 2018 atanga 2026 thlenga MPCB hnuaiah mi 145-te training pek tawh an ni a, chung atang chuan mi 20-in sorkar hnuaiah hna an hmu tawh a, mi 21-in mahniin eizawnna bul an tan bawk a, zirna sang zawk beih chhunzawm leh mek hi engemaw zat an awm bawk.