Lok Sabha-a eptu hruaitu, Leader of Opposition Rahul Gandhi-a chuan tun thla tawp hian Manipur a tlawh a tum nia sawi a ni.
Congress hruaitu, Keisham Meghachandra-a chuan Thawhtanni khan Gandhi-a hian nakuma legislative assembly inthlan tur thlir chungin tun laia an state chhunga buaina avanga tlanchhia chhungkua leh a tuartute kawm turin an Manipur hi tlawh a tum tih a sawi a ni.
“A hun hman dan tur hi duan chhin mek a la ni a, pawm a la ni chiang lo thung,” a ti bawk.
Hetih lai hian Manipur High Court chuan sorkar laipui chu chhiarpui neih mekah an state-a in chhiar (houselisting) chu April 30, 2027 thlenga sawn hla turin a hriattir a, chhiarpui hmaa National Register of Citizens (NRC) kalpui tura ngenna awm pawh thlir nawn leh turin a ti bawk.
Chief Justice M Sundar-a leh Justice Aribam Guneshwar Sharma-a te awmna division bench chuan November 4 khan PIL leh writ petition te a ngaihtuah a. Registrar General & Census Commissioner of India hnenah Manipur-a vantlang pawl leh zirlai pawl aiawh pasarihten ngenna an thlen angin April 30, 2027 thleng chhiarpui kalpui chu ti tawh rih lo turin a ti a ni.
Petition hi Kangleipak Students’ Association, International Peace & Social Advancement, vantlang pawl 14 leh Joint Committee Opposing Delimitation Exercise in Manipur tanghoten an thehluh niin kum 1871 leh 2011 chhiarpui inkarah tlangram district-a mihring pung nasa lutuk chu ni theiin an hre lo va. Hei vang hian kum 1951 behchhanin NRC chhiarpui neih hmaa ram mi dik tak hriat theih nan NRC kalpui an phut a ni.
Court chuan vantlang pawl aiawh leh pawl dangte chu chawlhkar thum chhunga an ngaihdan thlen tura tiin hemi hnu lama thehluh chu pawm a ni dawn lo tih a sawi.