Aizawl: Mizoram mipuiin ram rorelna tha a thlen ngei beiseia ZPM party an thlan avangin an lakah mipui beiseina a sang bik a. MLA inthlanpui neih leh turah Mamit bial mai bakah Mizoram district pumah chak ngei an tum dawn tih Chief Minister leh ZPM Party President Lalduhoma chuan a sawi.
Thawhlehnia Mamit Central block conference 2026, Field Veng-a Mamit Indoor Hall-ah neihah Chief Minister Lalduhoma chuan thiamna thar zela hma sawn tura hmalakna hrang hrang awm mek zingah party app thar duan a nih thu a sawi a. Mizoram bial zawng zawng a unit leh block dinhmunte chu digitise vek anih tur thu a sawi a, hei hian phone hmanga party dinhmun awlsam taka en zung zung theihna a siam dawn tih a sawi.
Chief Minister chuan party dangte thil tih mipuiten an enliam mai mai ang te pawh ZPM party-in an tih ve chuan mipuite thikthu a chhiat bik thu sawiin, ruling party an nih angin an hnathawh tawhte pawh mi dangte aiin a tha bik tur a ni a, monitoring committee-te endik hunah pawh an mit tlung zui zel tura hna thawh a tul thu a sawi.
Ram chhungah party member intamsiak zawnga a kal tawh avangin ZPM pawhin Mizorama party member tam ber nih tuma hma an lak chhoh zel tur thu a sawi a. Inthlan leh hunah Mamit bial mai ni lovin Mamit district pumah ZPM tlin an tum dawn thu sawiin, chumi puitlin tur chuan unit leh block hruaitute pawhin neutral te leh party-a awm lo te pawhin awlsam taka an rawn zawm ve chakna tura fel leh tha taka party kaihhruai a tul thu Lalduhoma’n a sawi bawk.
Inkhawmah hian ZPM Vice President leh Adviser to CM Lalmuanpuia Punte, Cabinet Minister Lalthansanga leh Minister PC Vanlalruata te pawhin thu an sawi.
Inkhawmah hian ZPM President Lalduhoma’n an party zawm thar mi eng emaw zat a lawm lut a ni.