Aizawl: Mizoram sawrkar chu eng tik lai pawhin kut hnathawktute lamah a tang zel dawn a, dan phal loha ramri pela kuhva phurh luh ruk avanga harsatnate pawh sorkarin rang taka bawhzuiin hma a la chho zel a ni tiin Home Minister K. Sapdanga chuan a sawi.
Thawhlehni khan Hachhek Bial Kuhva Chingtu Pawl (HBKCP) huaihawta Kawrthah khuaa ‘Kuhva Kût’ hman a ni a. A hmanpuitu, home minister chuan kum rei tak chhung Mizorama kuhva chingtuten harsatna an tawk tawh thin tih sawiin, Burma atanga dan phal loha kuhva lut thin avangin tualchhung kuhva rah hralhna a chhia a, kut hnathawktute thlan tui a thlawnin a far fo thin a. Sorkar thar a lo din rualin chief minister thupek khauh tak leh dan kengkawhtute zarah, ruihhlo leh kuhva tawlhruk titawp tura hma lak a nih thu a sawi.
K Sapdanga chuan YMA, police leh excise force-te tangruala an thawhrimna zarah kum 2025 chhung ringawt pawh khan kuhva smuggling thubuai 468 ziah luh a nih bakah mi 292 zet man an ni tawh a, hei hian tualchhung kuhva chingtute tan rah tha a chhuah chhoh tan tak mek thu a sawi bawk.
Khawchhak lam atanga harsatnate an sukiang tan chauh tihin, khawthlang lam, Assam ramri-ah Mizorama kuhva tharchhuah phurh luh harsatna a lo piang leh a. Aizawl Kuhva Chingtu Pawl hotute hneng atanga report a thlen veleh sorkar chuan bawhzui nghalin Mamit leh Kolasib DC-te chu an thenawm DC-te nen inbiaa, a rang thei ang ber a a hmuna kal turin inbuatsaihna an nei a. Assam Border Development Minister pawh biak pawh a nih tawh bakah, a tul huna Guwahati-a zin thla turin Aizawl Kuhva Chingtu hruaitute leh Adviser to CM Lalmuanpuia Punte, MLA te pawh an inpeih diam tawh thu a sawi bawk.
Kuhva Kût hi kut satliah a nih loh thu leh Mizoram mipui leh sorkar chawisanna, thawhrim rah lawmna kut a nih avangin a danglam bik hle a ni tiin Home Minister chuan a sawi bawk.
Kût hawnna inkhawmah hian bialtu MLA Robert Romawia Royte pawhin thu a sawi a, HBKCP Vice President Lalvenhima Ralte chuan Kût Souvenir a tlangzarh.
Kût hi Nilaini hian chhunzawm a ni dawn a, Chief Minister Lalduhoma leh Land Resources, Soil & Water Conservation Minister Lalthansanga te’n an hmanpui dawn a ni.