Aizawl: Mizoram chhunga iron rod zawrhte a size a dik loh nasat thin avangin leh mipui leh sorkar in saknaah nghawng tha lo a neih theih avangin, Legal Metrology department chuan an thupek chhuah tawh bawhzuiin November 11, 2026 atang khan Aizawl khawpui chhungah iron rod hralh dan endik hna an kalpui tan.
Controller of Legal Metrology-in thupek a lo chhuah tawh angin, rod size dik lo leh te zawk rawn lut tur ven nan iron rod reng reng chu a buk (by weighment) chauha hralh tur a ni a, hralhna atana hman bukna pawh Legal Metrology-in a endik sa chauh hman tur a ni.
He thupek zawm tura hun tiam, October 2026 a ral tak avangin Legal Metrology Enforcement team chuan a taka enfiah hna hi an thawk tan ta a ni.
Department hotute chuan Mizoram chhunga iron rod zuar dawr zawng zawngte chu dan anga hremna an pumpelh theih nan he thupek hi zawm theuh turin an ngen a, Assam lam atanga la luta dawr kaltlang lova hralh chhuak thinte pawh dan bawhchhiaa man chhuah an nih chuan hremna an pumpelh dawn loh thu an sawi.
Rod zuarte chu dan zawm vek tura chahin, mipuite pawh dan kenkawh kawnga department tawiawm theuh turin an ngen nghal a ni.