Aizawl: Aizawl khawpui laili atanga Assam Rifles sawn chhuah leh an chhuahsan tur ram chungchanga Major Babie Lalduhsangi (Retd.)-in YouTube kaltlanga a thusawite chu belhchian dawl lo leh thu dik lo a nih thu sawiin, November, 2026 ral hma ngeia ngaihdam dila thu dik puanzar a nih loh chuan dan anga court-a khin thlenga hmalak an tum thu MNF Treasurer Lalruatkima chuan Ningania MNF Hnam Runa chanchinbumite a kawmnaah a sawi.
Lalruatkima chuan party pakhatin an hruaitu lawk chhungkaw hnai vai nia hriat, sipai pension tawh hmanruaah hmanga MNF party leh MNF sorkar liam ta tihmingchhe zawnga thu dik lo an vawrh darh chiam mai chu en liam mai theih a nih loh thu a sawi a, thu dik hriat chu mipui chanvo a nih avangin sawifiah a tul ta tih a sawi.
Major Babie Lalduhsangi-in Lammual football ground chu LSC hmun li-a thendarh fel tawh anga a sawi chungchangah tu hminga siam nge leh engtik kuma pek chhuah nge tih mipui hmuh theih tura pho lang turin amah leh Mizoram sorkar chu MNF chuan a phut a, khatih laia opposition MLA Lalduhoma hnena Assam Rifles rama LSC neitute lehkha pawimawh a pe chu sorkar hnathawk kaihhruaina dan (CCS Conduct Rule) kalh a nih thu leh, list zawng zawng dawngtu Chief Minister Lalduhoma chuan thup nei lova mipui hmuha pho lang ngei turin an phut tih a sawi bawk.
Assam Rifles rama LSC 60 chuang hmuchhuak anga sawi chungchangah Lalruatkima chuan hengte hi sorkar record awmsa a nih thu leh party dang sorkar laia pek chhuah vek a nih thu sawiin, 1st Assam Rifles Bn. HQ Office leh Main Barrack area-ah LSC 54 (land lease 4 chu Bethlehem Veng VC Court, PHE Dept. leh primary school atan pek), Commandant Complex Tuikual South-ah LSC pali leh nursing staff quarters, Zarkawt-ah LSC pathum a awm thu a sawi.
MNF sorkar lai khan Assam Rifles ram chhungah mi mal hnenah LSC pakhat mah pek a nih loh thu leh Khatla Venga Assam Rifles chhuahsan ram pawh sorkar kutah vek a awm thu a sawi a, mi mal pamham leh thil titheiten ram an neih hlen lohna turin kum 2002 khan dan khauh tak, ‘The Mizoram (Restriction on Use of Transferred Land) Act, 2002’ an lo siam tawh bakah, kum 2019-a an sorkar atanga ni 94 chhung lekin (March 8, 2019 Council of Ministers meeting-ah) LSC lo nei tawhte cancel vek relin hma an lo la tawh tih Lalruatkima’n a sawi.
Memorandum of Agreement (MoA) leh NGO-te hmalakna ngaihthah anga sawi chungchangah MNF Treasurer chuan December 17, 2019 khan Mizoram sorkar chuan Draft MoA siamin 23 Sector Assam Rifles hnenah a lo thehluh tawh thu leh mipui tana phurrit turte paih thlak tuma indawrna a kal reng avanga sign mai theih loh a nih thu a sawi a, Central YMA pawhin Assam Rifles hmuna ram lo nei tawhte khingin kum 2020 khan PIL hial an lo thehlut tawh tih a sawi.
October 23, 2024-a Mizoram sorkar leh Assam Rifles-in MoA an ziahah Zokhawsang Assam Rifles hmun atan ni tin tui litre nuai 4.5 pek te, 250 KV electric transformer pali thawmthat sak te, Zokhawsang ram kum 99 chhung luah phalsak leh automatic-a pawhsei zel theih tura siam that bakah leiman awl sak leh kawng sialsak thlenga sorkarin mawhphurhna a lak thu sawiin, MNF treasurer chuan mi chhuanawm tak takte politics inbeihna atana hmang lo turin MNF chuan mipui leh party dangte a ngen tih a sawi bawk.