Aizawl: Aizawl khawpui chhung traffic jam leh kawng chep tihziaawm nana duan, Vaivakawn Elevated Road lungphum chu Ningani zing khan PWD Minister Vanlalhlana chuan Vaivakawn YMA Hall-ah phumin, Aizawl khawpui chhung kawng siam hna chu tan a ni dawn tih a sawi.
Lungphum phumna inkhawm, PWD Commissioner & Secretary V. Lalsangliana kaihhruaiah thu sawiin Minister Vanlalhlana chuan, Mizoram infrastructure hmasawnna atan ni hlimawm leh ropui tak a nih thu a sawi a. Vaivakawn chu veng pawimawh tak leh motor tlan tlang tamna hmun a nih avangin traffic jam leh kawng chep a nasa thin tih sawiin, chu harsatna chhawk zangkhai nana elevated road siam a ni dawn ta chu lawmawm a tih thu a sawi a, he hna hi tan vata zawh vat tum a nih avangin a thawktute, veng mipuite leh hotute chu theihtawp chhuaha tang rual turin a sawm.
Minister chuan Aizawl khawpui chhung kawng siam hna pawh chak taka kalpui tum a nih thu sawiin, khawpui chhung kawng 58, a belh khawma hm 87-a thui chu Ningani zan atangin siamthat tan a ni dawn tih a sawi bawk.
Mizoram sorkarin PMGSY hnuaia kawng siam nan Rs vaibelchhe 720 a dawn thu leh, Bawngkawn RCC Arch Bridge, Aizawl-Durtlang-Kawnpui kawng, World Bank Bypass Road leh Bawngkawn West – Hangi Lunglen Tlang kawng bakah hmachhawp tha tak tak dang tam tak kalpui mek a nih thu sawiin, Mizoram chu infrastructure lamah a changtlung chho mek a ni, Vanlalhlana’n a ti.
Khualzahawm, bialtu MLA ni bawk Lalnghinglova Hmar pawhin thu sawiin, Vaivakawn Elevated Road siam hna chu harsatna hrang hrang paltlanga sual chhuah a nih thu a sawi a, he kawng thar tur hian hlawhtlinna famkim a neih theih nan veng chhung leh bial mipuite tawiawmna leh thawhpuina a pawimawh hle dawn tih a sawi bawk.