MJA Serchhip-in lo neitute thawh chhuah pung tur nia lang lawmawm ti

Aizawl: Khawzawl district-a agriculture department hmalakna hrang hrang tlawha zin, Mizoram Journalists’ Association (MJA), Serchhip District member-te chuan department hmalakna hnuaiah kuthnathawktute thawh chhuah a pung dawn nia lang chu lawmawm an tih thu Zirtawpni zana Serchhip an thlen leh hnuin an sawi.

Serchhip District Agriculture Office buatsaiha November 11 atanga 13 chhunga Khawzawl district fang MJA member-te hi Khawzawl district Agriculture Officer Lallawmzuali leh a thawhpuiten dawngsawngin lo neitute huan nghet neihtir leh khawla puih a nih avanga kuthnathawkte an phur thu an lo hrilh a; hemi hnu hian Tualpui tlawhin, chhungkaw 100 chuangin tung kung 12,500 vel an enkawl mek leh a rah chhuah hmaa an ei leh in atana department-in behliang, vaimim leh nihawichi a ngaihtuahsak atanga an hlawhtlin dante an enfiah a ni.

Ningani khan Tualte-a tomato leh sawhthing kara nihawichi chin kawpna hmun leh nikuma Mizorama buh thar hnem ber, buh phur 1,200 chuang thartu, Lalnunmawia hmunhmate tlawhin an kawm a, hemi ni vek hian Champhai Winery tlawh nghalin grape thar leh wine siam chhuahte hralh zawh loh an neih loh thu Winery enkawltuten an lo hrilh bawk.

MJA member-te chuan kuthnathawktute taimakna leh sorkar tanpuina avanga thlai thar a pung chu Mizoramin a hmasawnpui ngei an rin thu sawiin hmachhawp la awmte pawh kuthnathawktuten a hlawkna la tel chhunzawm zel se an duh thu an sawi a ni.

Leave a Reply

error: Content is protected !!