PM-in EMRS, Zawlnuam bia; Pangzawl South-ah lung phum

Aizawl: Prime Minister Narendra Modi chuan tribal hruaitu huaisen Birsa Munda pianchamphaphak vawi 151-na leh ‘Janjatiya Gaurav Diwas’ lawmna pualin Pathianni khan Ministry of Tribal Affairs hnuaia din Ropuiliani Tribal Freedom Fighters Museum, Kelsih leh Eklavya Model Residential School (EMRS), Zawlnuam chu biak hmuh theihna kaltlangin a hawng a, EMRS, Pangzawl South sakna tur lungphum a phum nghal bawk.

Maharashtra-a Gadchiroli atanga India ram puma tribal-te chawikan nana Rs vaibelchhe 3,000 vel hu project hrang hrang 246 hawnna leh lungphum phumna hun hmanah Prime Minister chuan, zalenna sualtu tribal-te zahna chibai bukin an hnam ziarang leh ram tana an tha thawhte a chawimawi a; kum 12-13 kalta chhunga reitheihna ata mi vaibelchhe 50 vel khai chhuah an nih thu leh Naxalism leh Maoist hel awm lohna rama India siam a ni ta chu lawmawm a tih thu sawiin, intodelh leh hmasawn ‘Viksit Bharat’ siam turin mipuite tanrualpuiah a sawm bawk.

Kelsih-a Museum hawnna leh Lalnu Ropuiliani lim hawnna hun hmanpuitu Chief Minister Lalduhoma chuan British awpbehna duh lova ram leh hnam chhan nana nunna hlantu Lalnu Ropuiliani inpekna chu chhuanawm a tih thu sawiin, thangtharte chu changkannain hnam ziarang leh nunphung a chim ral mai loh nana humhalh tlat tur leh ram leh hnam tana huaisen taka tang tlat turin a chah.

Chief Secretary Khilli Ram Meena pawhin he museum hi thangtharte fuihtu leh Mizo chanchin zirna hmun pawimawh tak a la nih dawn thu a sawi.

Museum, Open Air Theatre, Traditional Hut, Heritage Walk leh Birsa Munda Tribal Pride Garden awmna Ropuiliani Tribal Freedom Fighters Museum hawnna hunah hian MLA Lalchhuanthanga, Ministry of Tribal Affairs Joint Secretary T. Roumuan Paite, sorkar official pawimawhte leh Lalnu Ropuiliani thlahte an tel a ni.

Leave a Reply

error: Content is protected !!