Delhi Chief Minister Arvind Kejriwal chuan an state-ah Covid-19 hripui chu na takin thawk leh mek mah se ram khawpui ber chu inkharkhip tumna a awm lo tih a sawi.
Tuna khawpuia hri leng darh leh mek chu a hmaa mi ang em a la nih loh thu a sawi a, “Inkharkhip \ulna a la awm rih lo,” a ti.
“Kan dinhmun kan thlir zel ang a, nakinah chuan inkharkhip hi kan la mamawh mai thei a, thutlukna siam hmain kan inrawn zel ang,” tiin nimin khan a sawi.
Chief Minister chuan ram pumah hri leng hi a thawh hnihna angin sawi a nih laiin Delhi bikah chuan a thawh lina lai a nih tawh thu a sawi bawk.
Nimin khan Kejriwal hian Delhi-a hri leng thar leh chungchangah hian emergency meeting a ko va. “Hri kai hi an tam chak hle a, hei hi kan buaipui ber a ni a; mahse, chiaina tur a awm lo. October khan ni tin mi 3,000-4,000 vel kai ziah ang kan ni a, chu chu tuna kan dinhmun mek ang vel hi a ni a, ICU-ah damlo an tam hle bawk a, thi pawh an tam a; mahse, a hmaa mi ai khan tunah hian ngaihven zual a ngai a, ina khung hran pawh an tam daih zawk a ni,” tiin a sawi.