Aizawl: MNF party adviser, Aizawl East II bialtu, Minister of State ni bawk Robert Romawia Royte-in Congress president Lalsawta chungchang sawiin, “Aizawl East II mipui mamawh chhang thei lotu hian Zoram mamawh hi engtinmah a chhang thei lo vang,” a ti.
Aizawl East II MNF block political training, Armed Veng South Community Hall-a neihah he thu hi Ningani khan Robert Romawia chuan a sawi a. “Kum 10 chhung khan Aizawl East II-ah engnge a tih kan hria a, a intiam angin a awm lo hle,” a ti a. “MPCC president thar hi Aizawl East II mipuiten kum 10 chhunga a thil tih kan hre chiang hle a ni,” a ti bawk.
Robert Romawia chuan MNF-ah chauh lo chuan party dangah beisei tur a awm lo nia sawiin, Aizawl East II biala Dawrpuiah pawh Rs. nuai 1,000 telin hma an la mek niin a sawi a. Armed Vengah field chhawng siam mek a nih thu te, Chite-ah field ropui tak din a nih tur thu te, Chite Convention Centre, state sorkar sum ni lo, Rs. nuai 4,000-a sak tan thuai a nih tur thu te, a bulah Rs. nuai 3,000 man bazarpui sak an tum thu te, Chite-ah vek power sub-station Rs. nuai 1,000 senga an din tur thu te bakah Armed Veng lei che thin veng tura hma an lak tan tur thu te a sawi.
ZPM chungchang pawh Robert Romawia chuan sawiin ZPM nihna leh a chhunga mite pawh mipuiin an hre chiang zel a, thalai, zirlai leh YMA leh kohhran hruaitute thlengin MLA inthlan laia ZPM ang kha an ni tawh lo tih an hre tawh niin a sawi a. Thalai leh zirlai hruaitu hluite pawhin MNF party bawk an thlang leh thin nia sawiin, “ZPM leh Congress-ah mi pangngai an lut duh lo,” a ti bawk.