aIZAWL: North East on Wheels expedition-a team pakhat Saza – Serow team-in Nilaini khan Jampui, Tripura atanga Mizoram lutin, chawhnu lamah Aizawl an thleng a. Larsap Hari Babu Kambhampati-a’n Raj Bhavan-ah thingpui ruai a buatsaihsak. Saza – Serow team te hi Aizawl Lengte peng atangin Tourism minister Robert Romawia Royte-in Bike hmangin Aizawl a hruailut a ni.
Larsap chuan India ram hmun hrang hrang atanga Bike hmanga Mizorama lut te chu Mizoramah hun hlimawm tak hmang turin a lo lawm a. Mizoramah state pawn lam mite la hmuh ngaih loh hmun mawi tak tak, Mizo khawtlang nun entawntlak tak tak te leh sik leh sa nuam em em te a awm thu leh heng te hi Mizoram tlawh nawn leh na tham an nih thu a sawi.
Mizo mipuite chu hawihawm tak, khualzin duatthiam leh remna leh muanna ngaina tak nia sawiin Larsap chuan Mizoramah hmun mawi tak tak te chu pawn lam miin an la hre pawh lo hle tih a sawi a. Mizoram tlawhtute chu pawn lam mite tana Mizoram chung- chang sawihawngtu an nih ngei a beisei thu hrilhin, an then leh rualte nen Mizoram tlawh leh ngei turin a sawm nghal.
Tourism minister Robert Romawia Royte pawhin Central sorkawr ruahmannaa hmarchhak state leh hmarchhakmite khawsak dan hriatchian theihna tur Biker te hmanga buatsaih a ni chu dangdai a tih thu leh remchang hlea a hriat thu a sawi a. Mizoram tourism hnuaiah pawn lam mi ten Mizorama hun hlimawm tak, an hriatreng tur tlawhpawh tur leh belhchian tur tam tak a awm thu a sawi bawk.
Amazing Namaste Foundation chairman Atul Kulkarni pawhin Biker te kalna apiangah programme awmze nei buatsaih a nih thu sawiin, Biker te tana an kalna hmun leh mi chengte nena inbelhchianna hun a tam thei ang ber siam a nih thu a sawi a. He programme hnuaia team tin ten KM 1400 chuang zel hmarchhak bial hrang hrang fanga an kal kual thu a sawi.
North East on Wheels expedition, ni 9 chhung awh tur hi India zalen kum 75-na lawmna -Azadi Ka Amrit Mahotsav- kal zela hmalakna pakhat niin, Amazing Namaste Foundation-in a huaihawt a ni a. Hmarchhak bial hriatchianna tura Biker 75 te puala North East state fanchhuah programme-ah hian Team 6 awmin, Saza – Serow te- am-ah Mizo nula Rosalyn Lushai chu leader a ni a. Aizawl, Thenzawl leh Vairengteah te hun an hmang anga, naktukah Jowai, Shillong a riak lut turin Mizoram an chhuahsan leh dawn a ni.