Tuirial bial bye election beih tura INC official candidate Chalrosanga Ralte (Mavala) chuan nimin khan Zanlawn-ah campaign office a hawng.
Party office hawnna inkhawmah thu sawiin Mavala hian boruaka tham ral leh mai mai tur chu a tiam ve dawn loh thu a sawi.
“MNF party chuan tun hnaia bye election neih tawna Aizawl West I leh Serchhip bialah khan mipuite hnena vote zawn nan development hnathawh tur leh sorkar hna an tiam nasa hle a; amaherawhchu, engmah tihhlawhtlin tak tak a awm lo,” a ti a. “Tun tum bye election neih leh turah pawh hian mipuite hnenah thu an lo tiam leh a nih chuan, lo awih tawh suh u. An thutiamte tihhlawhtlin tum pawh ni ta se, Tuirial bial aia senior bial hnih an la awm a. Kei chuan ka tihhlawhtlin theih loh tur chu ka tiam ve dawn lo a ni,” a ti.
Mizoram hmasawnna hnathawh lian tham zawng zawng hi Congress sorkarin a thawh deuh vak nih thu Chalrosanga Ralte hian a sawi a. Tuirial biala hmasawnna ruhrel din chho zel turin bial mipuite thawhpui-ah ka sawm che u a, in vote hlu tak min pe turin thinlung takin ka ngen a che u,” a ti.
Congress candidate chuan, “October 30, 2021-ah bye election kan nei tawh dawn a, party worker-te pawh kan tang tlang tawh khawp mai a. Hetih lai hian political party-te leh Kkhhran hoten inthlanna felfai awm theih nana kan thawhhona thuthlungte bawhchhe lo hram hram turin party worker zawng zawngte ka ngen takzet a ni,” a ti bawk.