India rama hralh chhuah a nih rualin mipuiin an inchuh nasat avangin tihtawp lailawk a ni hial a, he car Mahindra XUV 700 hi inrinni hian Mana Motors showroom, Bawngkawn, Aizawlah Mizorama zawrh chhuah turin Jeje Lalpekhlua’n a tlangzarh.
India tan vawi 56 a khelh atanga goal 23 khung tawh Jeje-a chuan ‘Mizoten kawngpui tha kan mamawh’ tih sawiin ‘Mana Motors-in Mizoram tan tha an thawh hle’ niin a hre bawk.
“India ram bakah ram hrang 20 vel inkhelin ka tlawh tawh a, ka sawi ve thin chu an kawngpui a tha thei em em a ni. Kawng hi mi tin chhawr theih a ni a, sorkar hotuten ngai pawimawh thei se a tha hle a ni. Mana Motors neitu Marinate chhungkuain thalai mi 200 vel an chhawr a, eizawnna tam tak an siamsak bakah Mizoram tan tha an thawh fo thin a, ram tan tha thawh tam zel turin duhsakna ka hlan a ni,” a ti.
Car chungchang sawitu Lalrawngbawla-a’n an zawrh chhuah atanga rei lo te chhungin an inchuh nasa a, XUV 700 hi Mahindra vawrh kangtu tur a nih a beisei.
“October 7 khan India rama a vawi khat nan 25,000 tan booking hawn a ni a, minute 57 chhungin a zo vek. October 8 khan booking hawn leh a niin darkar hnih chhungin 25,000 dang a zo leh vek bawk a, India ram record niin an titawp ta rih.
“Mahindra hian he model bik hi hmasawnpui theitu pawimawh a ni tih an ring nghet hle a ni ang; a man pawh rin lawk aiin a tlawm tlat a, cheng nuai 12 vel chauh atangin a intan,” a ti.
Mizorama Mahindra dealer Mana Motors neitu Dr Franklin Lalrinngheta chuan XUV 700 chu an nghahhlelh , Mahindra car chhuanvawr leh changkang ber a nih thu a sawi bakah, Mahindra inrelbawlna a inthlak danglam nasa, chumiin a hrin chhuah a nih thu a sawi bawk.
Bawla chuan, “Tunhnaia India ramah Mahinhra an tlahniam deuh a, insiam that tumin nasa takin a chhan an zir chiang. Car ruangam thar leh a zapui bera an hman thin thlak a tul niin an hria a ni ngei ang. “India rama car designer tha ber pawl Pratap Bose an la lut a, Mahindra-a a luh hnua a kutchhuak hmasa ber chu XUV 700 hi a ni a, tun dinhmunah phung zinga piring vawrh ang maiin mipuiin an duh a ni,” a ti.
Model MX PET MT 5 STR – Rs 11,990,00 atanga in\anin, model hrang hrang a awm dawn a, a to ber X7 L DSL AT 7 STR – Rs 21,59,001 a ni ang.