Zirlaite leh Hnam Hmangaihna by Centenary C. Lalzahawma

Zirlaite leh Hnam Hmangaihna

  • Centenary C. Lalzahawma

Thingkung pakhatin zâr tam tak a neih thin ang hian, hnam hmangaihna chungchângah zirlaite hian mawhphurhna tam tak kan nei a, chûng mawhphurhna kan neihte tihpuitlin hmasak a nih ngat loh chuan hnam hi hmangaih viau angah inngai mah ila, kan inngaih ang ngawt hian hnam tân tangkaina kan nei dâwn lo tih kan hriat hmasak a pawimawh hle. Zirlaite hi kan hnam tlu chhe mék tungding leh tûra hnam innghahna bul a ni a, kan mi hmasate thil tha tih chhawm nun zêl te, siam that ngai lai apiang siam that te leh an la tih ngai loh thil thar tam tak ti a, hnam hmangaihna rilru pua hma lam pan zêl hi a ni.
Engtinnge zirlaite hian kan hnam hi kan hmangaih tâk ang let A hmasa berah chuan Mizo hnam kan nihna leh kan nih dân kan hriat chian hmasak angai a, keimahni leh keimahni lam hi kan inhriat chian hmasak loh chuan hnam hmangaihna rilru hi zirlaite hian kan nei thei tak tak ngai lo vang. Tin, Zo hnahthlâk hnam pêng hrang hrangte laka inen hranna awm thîn hi kan paih bo a tûl bawk. Hei hian nasa takin Mizo hnam min then hranga, thenkhat tân hnam hmangaihtu nih a inhlahrunawm phah hial thîn. Chumi paih bo tûr chuan, ‘chhul khat chhuak, chûn khat hrin’ kan nih dân kan hriat chian a pawimawh hle. Engtinnge unau kan ni tih kan hriat theih ang a, Mizo kan ni tih mite hriatah leh hnam dangte hriatah kan sawi fiah angt “Lui tê hrang hrang atânga tui luang khâwmin luipui a siam thin ang hian, Zo hnahthlâk hnam pêng hrang hrangte hian Mizo hnam a siam a. Chûng lui tê hrang hrangte chuan hming bik an nei theuhva, nimahsela an infinkhâwm chiah chuan hming bîk nei tawh lovin chu luipui hming pakhat chu pu tlângin zâi khatah an luang zâ vek thîn. Chutiang tho chuan, Zo hnahthlâk hnam pêng hrang hrangte pawh hian hnam/chi bil hming bîk kan nei theuhva, chûng zawng zawngte sawi nân chuan Mizo tih a ni,” tih hi kan hriat dân tûr leh midangte hriatah leh hnam dangte hriata kan sawi fiah dân tûr chu a ni.
Lehkha zir mite chauh hi zirlai kan ni emt Tute nge zirlaite chut Engtinnge kan hnam hi kan hmangaih tâk angt Kan hriat theuh angin Zoram chhûng hmun hrang hrangah kawngpui siam an awm a. Chûng kawngpui siamna hmunah chuan Bulldozer, JCB, HITACHI leh a dang tam tak, tângkaina hrang hrang nei thiau an hmang. An tih theih inang lo thiau mah se, an tih tum leh an thil tum a danglam chuang lo. Chûng zawng zawng chuan tum thuhmun an nei a, chu an thil tum chu kawngpui tha tak siam a ni. Bulldozer chu eng anga tam pawh ni se, Bulldozer chauhin kawngpui tha tak a siam theih loh. JCB chauh pawn a theih chuang loh. HITACHI chauh pawhin kawngro a su tak tak lo. An vaia an thawhho chauhin an thil tum a hlawhtling thei a ni. Chutiang tho chuan, Zoram chhûng hmun hrang hrangah leh Zoram pawn lamah zirlai naupang tam tak kan awm, chûng zirlai hrang hrangte chu lehkha zir te, puan thui zir te, motor khalh zir te leh thiam thil chi hrang hrang zir te an ni. Chûng thiam thil chi hrang hrang zirlaite chuan tum thuhmun an nei a, chu an thil tum chu mahni intodelh leh mi harsa zâwkte dinhmun thaa ding thei tûra tanpui te, Mizo hnam kalphung leh chin dân tha lo nuai chimih te, chin dân tha tam tak hnam hmangaihtu thinglung pua an lo tih thin tih chhunzawm zêl te leh thil tha tam tak la tih belh a, ni tin mahni inzir chung zêla dam chhûng hun hman a ni. Lehkha zirlai naupangte chu eng anga tam pawh ni se, lehkha zirlaite chauhin hnam hmangaihna rilru puin hmasâwnna rahbi zawng zawng an siam thei lo. Motor khalhtute chauh pawhin an siam thei chuang lo. Puan thui zir te chauh pawhin an siam thei bîk lo. Kawng hrang hranga zirlaite, an thiamna zâwn zêla thiamna hmang chhuaka thawkhoin rahbi zawng zawng an siam thei chauh a ni. Hnam hi kan hmangaih chuan hnam thatna tûr ngaihtuahin thil tha kan tihsak thîn.
Zirlaiten hnam hmangaihna rilru dik tak kan put theih nân kan tih tûr leh kan tih loh tûr kan hriat hran a pawimawh hle. Kan tih ngei ngei tûr kan tih loh hian hnamin a tuar a, chutiang tho chuan, kan tih miah loh tûr kan tih pawh hian kan hnamin a tuar phah tho thîn. Kan tih tûr leh kan tih loh tûr te chu engnge nit Kan tih tûr leh kan tih loh tûr hrethiam tûr chuan khawvêla zirna school hmasa ber atânga zir tan angai a ni. Chu zirna school hmasa ber chu eng School nge nit “Chhûngkua hi khawvêla zirna School hmasa ber a ni a, Principal hmasa ber chu chhûngkaw Pa a ni. Miss (madam) hmasa ber chu chhûngkaw nu a ni a, zirlai naupang hmasa ber chu unau zînga upa ber hi a ni.” Chuvângin, chhûngkuaa zirtirna petu nu leh paten kan fanu fapate rilruah hnam hmangaihna rilru nghet an neih theih nan, têttê atânga kan zirtir a pawimawh hle a. Hnam hmangaihna rilru an neih theih nan leh an neih theih dân tûr kan zirtir thiam angai a ni.
Kan Mizo thufingin, “Sialrangin sialrang a hring, sakawlin sakawl a hring,” a tih ang khân, lehkha thiam fa chu lehkha thiam an ni tlângpui a, mi fel fa chu mi fel an ni tlângpui a, mi sual fa chu mi sual an ni tlângpui bawk. Hnam hmangaih nachâng hria chuan hnam hmangaih nachâng hria vêk fanu fapa a nei a, hnam hmangaih nachâng hre lo chuan hnam hmangaih nachâng hre lo vêk fanu fapa a nei thîn. Chutiang zêl chuan thil dang zawng zawngah pawh a ni tlângpui thîn. Pi leh pute atânga inthlahchhâwn thil a nih tlângpui avâng hian hnam hmangaihtu thinlung kan neih theih nân zirlai zawng zawngten kan kawng kan chhut ngun angai a, kan tu leh fate innghahna kan nih avângin kan nun kan uluk a pawimawh hle.
Pa pakhat pawh hian a fapa naupang kum ruk êm pawh la tling lo mit hmuhah an mahni inah ngei a thiante nên zu an inho thîn a. Chutia zu an in a, zu noa an thlit laite chuan a fapa chuan a lo en ve reng thîn. A pa chuan thil engmah hre lo angah ngaiin an zu in khawmna an inah ngei chuan a bulah te a lo awmtir ve mai thîn. Hun a lo inher liam zêl a, kum tam a lo vei meuh chuan a fapa naupang chhia ang chauha a lo ngaih thin kha a lo puitling ve dêr tawh mai a. A pa ang bawkin zu duh mi a lo ni ve ta mai a! A pa khân a naupan lai khân an zu inna no chu a fapa pein, “Kha in ve rawh Mama,” a ti ngai hauh lo. Mahse, “Thu aiin thil tih a au ring zâwk,” an tih kha, a pa thil tih ang kha a puitlin hnuah a ti ve mai a ni. Chuvangin, keini zirlai la ni mék te hi kawng engkimah kan fimkhur a pawimawh hle. Hnam hmangaihtu dik tak chuan ruihtheih thil a ti tûr a ni lo. Ruitheih thil tih leh zuk leh hmuam tih hi mimal tân buaina, chhûngkua tân harsatna, ram leh hnam tâna hmêlma a ni.
Zirlai naupangten hnam kan hmangaih tak tak a nih chuan kan zirlai kan ngaihsak angai a. Degree ngawr ngawr neih tum lovin, kan zir chin zêlah chhawr tlak leh râwn tlakin kan inzir tûr a ni. Kum 1636 khân Havard University din chhuaktu John Havard-a chuan, “Zirlai zawng zawngte hian an hriatna leh zirna bulthutah Krista an dah tûr a ni,” a ti a. Philosopher Herbert Spencer-a chuan, “Zirnain a tum ber chu nungchang siam that a ni,” a ti bawk. Krista tel lovin Doctor, Philosopher, Lawyer, adt., pawh a nih theih. Hei vâng hian a ni mi thenkhat, thiamna sâng tak tak nei, hnam hmangaihtu dinhmun dik taka ding lovin sual kawng an zawh a, kum naupang têa an thih an thih thin ni. Sakhuana tel lo va inzirtirna chu, mi fing sual simna mai a ni si a! Krista rinchhana zirna beitute erawh an nungchang a tha a, sual kawng zawh lovin hma lam an pan a, hruaitu tha leh ropui, hnam tâna mi rintlâk leh rin ngam. Hun lo la awm zêl tûrah hnam innghahna an ni thîn.
Lehkha thiam tam tak awmna ram, mi thiam tlêmtê awmna ram a ni kan ram hi. Hnam dangten kan ram, kan hnam, leilung fate leh a chhûnga awmte hi Chempui aiah thiam thil chi hrang hrang hmangin min bei mêk a ni tih hi hria ila, zirna atâng hian kan hnam hi i vênghim ang u. Chu chu zirlaite mawhphurhna a ni. “Engnge i nih bîkt” intihna khawvêlah kan chên tawh avâng hian engkimah mahni lam a fel hmasak phawt zêl angai. Chutiang a nih loh chuan, kan thusawi leh kan thil tihin kawngro a su tam lo hle ang. Chuvângin, hnam hmangaihtu leh hnam hruaitu, midangte kaihruai thei ni tûrin kan kawng kan thian fai hmasak a pawimawh.
Zirlaite hi nakin lawka hnam hruaitu tûr te kan la nih avangin hnam hmangaihna rilru kan put sa a pawimawh hle. Chutiang a nih loh chuan hlemhlêtna (knavery) leh ei rûkna (corruption) thangah awlsam takin kan la âwk ngei ang. Hnam hmangaiha rilru putu tân chuan hnam hi a chhiat ai chuan mahnia tuar mai pawh a huam thîn. Chutiang mite chuan ram leh hnam an siam tha a, an tichangkânga, an tihmasâwn thîn. Spain Lal Alfanso fapa, Mohammedan-hovin an rûk bosak tuma, “Alfanso, kan kutah i ram i hlân dâwn nge, i fapa hi kan that dâwnt” tia an zawh tum khan. Mahni aia ram hmangaih zâwktu Alfanso chuan, “Ka ram leh ka mite an himna tûr a nih dâwn phawt chuan ka fapa chu that mai rawh u,” tiin a chhâng a nih kha. A fapa kha a thlahlelin a hmangaih lo zâwk a ni lo va, a ram leh hnam kha a thlahlelin a hmangaih zâwk a ni. Theih ni se, a fapa nunna leh a ram humhim chu a thlang ngei ang.
Ram changkang leh hnam changkang hmasate pawhina an lo tawn thîn, changkannain a rawn kut chawi hnam hlutna thlahniam zêl hi zirlai ten kan ngaihtuah chian a, kan ngaihven a hun tawh hle. Changkanna hi mi tinte mamawh leh duh ber a nih rual rual hian, changkan dân dik lo va changkan erawh a pawi hle. A phênah chhiatna tam tak a awm tel a, hnam ri ral (annihilate) mai theihna a sâng hle bawk. Kan hnam tawng, Mizo Subject hi tun laiah zirlai naupang tam zâwk ten zir harsa an tih, a chhiar pawh an chhiar that theih tawh loh, examnaah pawh mark an hmuh chhiat ber thinna Subject a ni ta!
Tin, kan hnam incheina dik tak a bo mai loh nan kan hnam incheina kan uar thar a tûl hle. Nupui pasal neih chungchângah pawh mahni hnampuite aiin hnam dang nupui pasala nei kan tam ta. Hêng mite hi an ni hnam phatsantu leh hnam hmangaih lotute chu! Kan bansan a hun tawh hle. “A nuam apiang umtu chuan a hrehawm pawh a um pha thuai thîn,” tih a nih kha. Tin, changkannain a ken tel mi chi hrang hrangten kan ram chhûngah awmhmun an khuar mêk a, in hmun leh ram pawh an nei nasa tawh hle. A bîkin kan thenawm state atângin Vaiho an lo lût nasa hle bawk. Engtik niah emaw chuan, kan in hmun leh ram te, kan fanu fapa, kan nupui pasalte thlengin min la chhuh ngei ang. Chumi vênghim tûr chuan zirlaite hian mawhphurhna sâng tak kan nei a ni. Mei chu a alh nasat hmaa tihchimih a nih loh chuan, ram pum a kâng thei. Tun hun hi a ni hun tha, mei alh kâng kai zêl tûr tihchimih hun chu!
Thingtlâng atânga eizawnna avâng emaw, zirna avâng emaw a Zawl khawpuia mi inluaha awm Zofate, Pem Lehkha nei ngei tûrin khauh takin veng tinah YMA hruaitu ten hma an la thîn. Mahse, Vaiho erawh awlsam têin engtin tin emaw ILP an nei zung zung a. ILP endik (check) rûnpui an nei a nih loh phei chuan an endik (check) zen zen meuh lo. An ram (state)-a thawnkîr ngam hruaitu lah chhiar tham lek. Kum tam kal taa Raju kha, tunah pawh a la ngai reng. A hming maia inti khauh hian hnam tân tângkaina an nei lo. Mite mit hmuha inla khauh hle si, a rûka dawih leh viau si nun hi zirlaite hian kan paih bo a hun ta. Pi leh pute thlarauin min dem lutuk palh ang e! Zawi zawin kan hnam tlêmtê hi min chim ral mêk a, min la chim ral zêl dawn. German philosopher Immanuel Kant-a’n, “Zirna hian mihring atângin engkim a siam chhuak thei a ni,” a ti a. Jack Moffit-a chuan, “I ke chelhdingtu chu i kova mawhphurhna vang a ni,” a ti bawk. Chuvângin, zirlai naupangte hian kan zir thiamna atâng hian engkim kan la siam chhuah a, kan la siam that bawk a, kan la siam thar bawk a hun ta. Hnam hmangaihna rilru pua kan mawhphurhna thlen chhuah hi kan tih tûr a ni a, kan kova mawhphurhna hian kan ke pên tinte pên dik tirin, kan kalna apiangah kan ke chelhdingtu ni fo rawh se.
Ram leh hnam hmangaihna-ah chuan, mahni hmasialna leh midang huatna leh taina a tel lo va, mahni inhlan ralna a ni zâwk a ni. Chu chu a ni Lincoln-a te, Joan of Arc te leh De Valera te’na mawi theihtâwpa an partir chu! Mahni ram hmangaihtu (Patriot) dik tak chuan, khawvêlah a châm chhûngin a ram leh hnam a hmangaihzia lantîr nân rohlu hnutchhiah ngei a tum tlat thîn. Keini zirlaite pawh hian hnam tân rohlu kan hnutchhiah theih nân hnam tân theihtâwp chhuahin bei ila, rohlu kan hnutchhiah thei lo a nih pawhin, entawn tlâk nungchang tha tal kan hnutchhiah tûr a ni.
Kan hnam lo chu hmangaih tûr hnam dang kan nei lo. Mizo hnam ziarâng (culture) chawinungin hnam dangte lakah chungnunna rilru zirlaiten kan pu tlat tûr a ni. Pathianin mahni hnam ang zêla kan pâr chhuah a duh tih hria ila, Zozia taka kan lan hi kan mawina leh zahawmna bulpui ber a ni a, mahni hnam kan changkân san tûr a ni lo va, kan ngaisângin hnam rilru kan put chhûng chuan kan chungchuang bîk a ni tih hi zirlaiten kan rilru-ah i tuh nghet tlat ang u. Hei lo liama hnam hmangaihtu nih dân a awm thei chuang àwm love.

Leave a Reply

Your email address will not be published. Required fields are marked *

error: Content is protected !!