DAMLO DANG
- HC Vanlalruata
Covid-19 hri léngin kumkhat leh a chanve chuang min hrual chhung hian, sorkar a mipui hriselna lam ngaihtuahtu ber, Health and Family Welfare department chuan a tha-pui leh sum tam ber chu hri léng dona atan a hmang a ni ber a. Hnathawkte’n hri kai an enkawlna tur hmanrua, hri kai leh kai lo endikna hmanrua (sample lakna leh test kit) tam tham tak, damlo enkawl lai emaw sample lak emaw a hri laka invenna (PPE, hmuituamna, kutkawr etc.) leina atan hian cheng vaibelchhe bi a kal ngei ang tih a rinawm. Mamawhna a na bawk a.
Department a thawktu ni ve lo tan chuan an buaizia te, an hun a khahzia te, Minister aţanga a té ber thlenga an hmanhlelzia hi kan zu hre ve sísè lova. Khawvel ram changkang leh mipui hriselna lama hmasawn ber ber te pawhin, mi nuai/maktaduai tam tak nunna an chhan theih bik loh phahna, he hriléng dotu, kan sorkar a helam buaipuitute hi fakawm tak an ni a. Duhthawh thilah erawh chuan kan dem bawrh bawrh a, tisual palh thei mihring an ni ve miau mai a.
Hei mai piahah hian mimal leh kohhran enkawl damdawiin te pawh he hriléng hian a tibuai a, chu chuan mipui nasa takin min tibuai bawk a. Eng natna nge kan vei chiah tih pawh hriat hauh hma-in damdawiin-a kan inentir dawnin, Covid-19 hri kan kai leh kai loh endik phawt a lo ngai a. Damlo na zual, hlăng a damdawiin-a zawn luhte ngei pawh hlahthlem an ni lo. Mithiamte kuta enkawlna rang tak mamawh tan pawh hei hi pumpelh theih a ni lova, mihring nunna chhanna tana hun pawimawh lutuk, ‘golden hour’ an tih mai pawh doctor-te’n an ngaipawimawh hleithei lo a ni ber.
Tunhnai-ah (state Level Expert Team on Covid-19 Management te thurawn vang a nih hmel a) sorkar chuan thupek thar siamin damlo na zual, damdawiin emergency/casualty department/ward-a luhpui turte chu Covid-19 hri an kai leh kai loh endik hmasa kher lova, damdawi lam thiamte’n a rang thei ang bera an enkawl nghal turin a ti ta a. Hei hi thil lawmawm tăwpkhăwk, damlo leh a chhungte tâna chanchin ţha dik tak a ni.
Sawi leh sawi hnu, Mizote’n sakhuana/kohhran duhdan aţanga engkim kan teh vek ringawt zel anga hri lèn hnu a, dam lohna chungchang, hriléng nena inlaichinna nei reng reng lo, natna dang daih veite pawh Covid-19 an kai leh kai loh ngaih pawimawh hmasak zawka kan neih tlat ţhin hi her dik a hun tawh reng a ni. Hei hi kan tih loh chuan natna dang veite enkawlna ţha dawng hleithei lovin tam tak an thi thei tih hi kan hriat a hun hle tawh a ni.
Mi pakhat, kum lam pawh upa tawh tak kha cancer emaw natna dang vanga chau tawh tak kha, a nunna pawhsei theih hram beiseiin amah hmangaihtu a chhungte’n damdawiin-ah an hruai a. Amah leh a dinhmun ngaihtuah thei lek lova damdawiin kawta lo duty-te leh doctor-te hial pawhin Covid-19 hri a kai leh kai loh ringawt mai, zawhna eng engemaw an lo zawh khawtlai a hnu hman a, hri a kai leh kai loh an endik chhung leh result chhuah chhung an nghahtir ang chi hi, thil răpthlăk eltiang a ni.
A hri kai za zela 0.35 pawhin nunna an chân loh natna kan hlauh leh buaipui hluhlãng lutuk avanga Mizote’n thihpui ngei ngei tur deuhthaw a kan ngaih, cancer leh natna khirhkhan dang veite pawh ngaihtuah leh ngaihsak hlei thei lo lêka kan khawsa ta mai hi a zialo takzet a ni. Thil reng reng, a nihna tak aia, a insawiţhaih lama beng tivir zawk chi, Kristian thurin aia chhiatna lo thleng tur (thim thuah hnih tih ang chi) sawi tute thusawi ngaihven ching zawk kan nihna a tilang chiang hle.
Inkhâwm leh ţawngţai uar hnam ni si hi nun kan uluk loh avangin enkawl dam theih loh natna HIV/AIDS vei tam berna state kan ni mek a, India rama zûk leh hmuam ti nasa ber kan nih rualin, chumi kaihhnawihah cancer chi hrang vei tam berna state kan ni bawk a, tunah hian kan la ni emaw, khawvel pum huap pawha a cancer chi engemawzat vei tam ber nihna kan neih ţhin kha. Thih thut theihna ruihhlo hi kan hlau lem lova, ruihhlo bawiha tâng kan ngah hle bawk. Hmui leh hnâr tuam ţhat a, mi hlata awm a leh kut silfai ngun a pumpelh mai theih, he hri hlau hian kan talbuai nasa rei ta lutuk deuh chu a ni.
Engemawti zawnga ngaihtuah phei chuan, Covid-19 vanga nunna chân an tam chhoh chhan hi, hri an kai hma a natna benvawn leh khirhkhan veite kan enkawl ţhat tawk loh vang – hri ringawt buaipui luih luih a kan hmanhlelh avanga enkawlna ţha dawn loh vang a ni mai awm mang e a tih theih. A chhan chu Covid-19 vanga thi zawng zawng deuhthaw hi, doctor-te’n natna benvawn leh khirhkhan nei vek an ni an ti a. Mihring taksa chaklo hian eng hri pawh hi an la na zual tih chu doctor ni kher lo pawhin kan hre vek a, natna benvawn nei, enkawl ţhat tawk lohte khan an kai hma-in an hneh lo hma bîk avangin nunna an chân a ni thei mai ang em?
Tunah chuan fimkhur chunga he hri hi kan nunpui a ngai tawh a. Chu chu kan mithiamte ngaihdan reng a ni a, sorkar pawhin a pawm thiam ta viau mai. Kan inkharkhip bur bur rei luat avanga kan ei leh bar/sum leh pai (economy) a nghawng chhiat tluk zet hian, kum upa lam leh natna benvawn/khirhkhan vei mekte kan enkawl ţha hlei thei lo rei a. Engkim mai hi kan hmu ‘covid’ deuh vek mai a, boruak inthlâk vanga tláng hriléng kan sawi ţhin pawh bo titihin, khuh kheuh kheuh apiang chu kan hlau a ni ta ber mai.
He hlauhna thlarau (fear psychosis) hian kan thãuvah a man a, natna benvawn leh khirh vei, a bîkin upa lam tawhte phei chu hri an kai hma hauh aţangin he hlauhna hian a tikhŭr nghal emaw ni chu tihtur a ni. Kan hlauh deuh mai hi chu hneh a lo har leh zel nĕn – natna khirhkhăn neite phei chu an râlkhelh nasat lutuk avangin an thi thut zêl mai emaw tih mai tur a ni. Chutih laiin Covid-19 vanga thi tam tak chu kum 90 pel tawhte, an thih pawha Mizovin ‘awmlai’ a thi kan tih anga kum upa tawhte an ni bawk.
Kan sorkar pawh hri do kawngah a inher dik chho zel a, theology zir chhuak te aiin, virology zir zo te thuràwn a lak zâwk zêl pawh a beiseiawm ta. Lockdown burh burh ang kha an sim tawh tih a lang bawk. Hetiang a lo nih takah chuan Mizo zinga kum upa lamte, a bikin natna khirhkhan leh benvawn neite hi ţha leh zuala ngaihvenin, duat leh zualin i enkawl tawh ang u le. Hri ringawt buaipui lova, natna dang, a bikin natna khirhkhan veite kan enkawl ţhat hi a hun takzet ta.
Hriléng kan buaipui luat avanga mipui hriselna kawng dangte, damlo natna khirhkhan vei dangte kan hlamchhiah lutuk kha inchhîrin in enlêt ila. Tun aţang chuan natna dang vei zawng zawng pawh dan pangngaiin enkawl ni leh tawh sela, an mamawh ang enkawlna leh ngaihsak an ţulna ang chena ngaihsak an ngai a ni. Engkim mai hmu ‘covid’ tawh lovin mihring (eng natna vei pawh) nunna chhan, natna tihdam leh an natna tihnêp hna lam i hawi tawh ang u le. Chutilo chu he kan hnam leh khawtlâng hi kan inţhen darh nasa lutukin kan inchemhăr tak ngial dawn e.