Kum a thar a, Mizoramah Covid-19 leng a hluar leh tan a, hri kai thar tamna chu thingtlang khuate niin, tun thla kal mek ni 15 chhunga hri kai hmuh chhuah tawh zinga zaa 69.42 chu Aizawl district pawn lam mi an ni.
January 14 leh 15-a Mizorama Covid-19 kai hmuh chhuah thar chu 1,657 a ni a, hemi nena January thla chhunga hri kai hmuh chhuah chu 10,590 a tling tawh a, ni 14 chhunga sample endik zat chu 70,923 a ni.
Hri leng thawh hnihnain Mizoram a nuai lai, nikum April atanga November thla chhung khan ni tina hri kai hmuh chhuah tharah Aizawl district chu a sang fal hle thin a, district dang 10-a hri kai belhkhawm aia a san tumte pawh a awm.
Tun hnaia hri leng a hluar thar leh hnuah erawh thingtlang lamah hri kai an pung nasa zual a, January 1-15 inkar chhunga hri kai hmuh chhuah 10,590 zinga 3,238 chu Aizawl district chhunga mi a ni a, mi 7,352-te chu Aizawl district pawna mite an ni.
District 11 zingah Khawzawl leh Serchhip-ah hri inkai darhna a thleng nasa zual a, ni 15 chhungin Serchhip district-ah hri kai hmuh chhuah 1,903 an awm tawh a, hei hi ni 14 chhunga Mizoram puma hri kai 10,590 atanga chhutin zaa 17.96 a ni a, Khawzawlah hri kai hmuh chhuah 1,183 awm tawhin, zaa 11.17 a ni.
January thla ni 15 chhunga hri kai hmuh chhuahah Aizawl district atanga kai hmuh chhuah an tam ber thung a, mihring awm zat atanga teh erawhin Aizawl district chu dinhmun chu Khawzawl leh Serchhip aiin a tha zawka ngaih a ni.
District dang, Champhai leh Mamit-ah hri kai thar an pung bawk a, Champhai district-ah 736 leh Mamit district-ah 961 te a ni.