Congress sorkar leh hunah sorkar hnathawkte leh central scheme hnuaia thawkte a hun takah hlawh an pek tur thu Congress Legislature Party Leader Zodintluanga Ralte-in a sawi.
Kawnpuia Congress Block inkhawmpui nimina a hmanpuinaah thu sawiin Zodintluanga Ralte chuan, tun sorkar hi sum enkawlah a hlawhchham avangin mipuiin nasa takin an tuar mek thu a sawi.
“Sorkar hnathawkte hlawh pek tlai, an GPF pek theih loh te. Central scheme hnuaia thawkte thla tam tak hlawh batte bakah Pensioner-te ‘pension benefits’ lak theih lohte hi a manganthlak takzet a ni. Kan sorkar leh hunah chuan sorkar hnathawkte leh central scheme hnuaia thawkte a hun takah an hlawh kan pe ang,” a ti.
Congress MLA Zodintluanga Ralte chuan, tun hnaia SEDP sorkarin sem a tum thu a puan laiin, health care bill mipuiah a ba a, pawisa a awm lo tih chu nitina ram hruaitute ka atanga hriat a nih thu a sawi.
“Nikum budget-ah khan hmasawnna tura dah a awm lo a, sorkar hnathawk hlawh chauh a ni kan ‘pass’ ni, hetiang renga kan kal chuan kan mi thiamte pawhin sorkar kal thei loah min hnuh luh an hlau tawh a ni,” a ti bawk.
Chief Minister Zoramthanga buaipui ber mau/rua chinah a hlawhtlinna kum thum hnuah hmuh tur a awm loh thu a sawi a. Tun tum SEDP sem tura mau an telh ta lo hial chu a naute hian an ring rawk lo tihna a nih thu a sawi.
Sorkarin SEDP sem a tum chungchangah MNF party unit chu a dawngtu tur thlang tura ruat nia a lan thu leh mipui chhiah pungkhawm, mipui sum heti mai maia sem ral tur a nih loh thu, Zodintluanga hian a sawi.
Congress party chu ram leh hnam siam nan Pathianin a ruat tlat thu sawiin, tunah pawh sorkar hnathawk tam takin nakkum maia sorkar turin min ngai leh der tawh niin a sawi.
“Vawiinah pawh ZPM Headquarters Jt. Secretary chu Congress Bhavan-ah lawm luh turin a rawn inpe tawp mai,” tiin, Block Congress mipui kalkhawmte hmaah a sawi a ni.