Manchester United in trophy chawi beisei a ke an penna chu tun season-ah a thamral zawngin a kal leh mek a. FA Cup fourth round pel zo lovin penalty shootout-ah Middlesbrough lakah an tlawm.
Rawlthar striker Anthony Elanga chuan midang zawngin an pet goal laiin a penalty a khung lova, hei hi Chris Wilder-a pawlte chakna niin anmahni zuitu \antu mipui 9,000 hmaah Boro an lawm.
Red Devils an hnawtchhuak
Old Trafford-ah Championship club Middlebrough an lenglut a, beisei loh result neih theih a ni tih hre chungin an inkhel a, mahse United lakah zan hautak a ni dawn tih an hria.
An goal khung pawhin sawisel a hlawh hle a, Matt Crooks goal khung tura ball pe tu Duncan Watmore chuan chiang takin penalty area chhunga ball a dawnin a kutin a khawih a, hei hi United lamin handball turah an ngai a, referee leh VAR erawhin handball dan thar hnuaiah a thiang niin an ngai.
Nimahsela minute 120 chhung inkhelah an chak zawh loh chhan hi goal sawisel hlawh vang ni lovin United in an thunun inkhelah a hmawr an bawk theih loh vang a ni.
Boro goal-ah lamah chance vawi 30 lai an nei a, first half-ah Cristiano Ronaldo chuan penalty an hmuh a khung lova. Jadon Sancho leh Bruno Fernandes ten goal bar leh a ban an tih per a. Boro goalkeeper leh an tlarhnung te chesual ngun hle mahse remchangah United in an la thei lo.
Marcus Rashford goal khung chu pawmsak loh a ni bawk a, United tana goal awmchhun hi Jadon Sancho khung niin FA Cup a inlan hmasak berah goal a khung.
Manchester United manager Ralf Rangnick chuan thutlukna sawiselin, “Boruaka ball awm kha a kutin a vai thla a, chu chu tihpalh engtinnge a nih theih? Pawm loh tur chiang tak an pawm kha mak ka ti.”
“First half-ah goal thum tal a hmahruai tur kan ni a, second half-ah pawh chance kan nei. Hun pangngaiah khan chak hle tur kan ni, penalty a nih tawh chuan hetiang hi a thleng thei.” tiin an tlak chhan chu anmahni mawh a nih thu a sawi.
Middlesbrough manager Chris Wilder chuan, “Kan hlim tak zet a, kan khingpuite erawh an hrilhhai ang. Cup inkhel chu hetiang hi a ni thei tlat a, vanneihna kan lamah a \ang a, hun\ha kan neih kan hmang a, penalty kan chhawr hle.” a ti.
Blues an buai teuh
Inrinni zana inkhelah Chelsea in League One club Plymouth Argyle hneh turin extra-time khelh an mamawh a. Hun pekbelhah hian an khingpuite penalty khung loh chu vanneihpui in 2-1 in an chak.
Stamford Bridge-ah fans 6,000 vel nen Plymouth an inlan a, duhthusam a bul \anin minute 8-naah Jordan Houghton cross chu Macaulay Gillesphey chuan a tauh lut.
Bul an \an \hat avangin Plymouth an phur a, mahse first half tawp dawn lamah Chelsea tan Cesar Azpilicueta chuan fing takin an si phurh sutna a thai lut.
Chelsea manager Thomas Tuchel-a’n Covid 19 avanga a pawlte inkhel a enkawl theih loh avanga assistant Arno Michels hova inkhel Blues in inkhel an thunun hle a. Corner vawi 20 neiin shot vawi 41 an nei.
Nimahsela Plymouth an phur a, rim taka thawkin ngawrh takin an goal an veng a, second half-ah Blues an dang tluan.
Extra-timeh ah Marcos Alonso hmangin chakna goal an khung a. He goal hi Ryan Hardie chuan sut theihna hun nei mahse Kepa Arrizabalaga chuan a penalty pet satliah tak chu a dansak.
Chak mahse Hammers mualpho
Premier League a che \ha West Ham United chuan England football duvision parukna a khel Kidderminster Harriers hneh turin hun pangngai leh extra-time tawp dawnah goal an khung thei hram a. 2-1 in an hnehna an chang hram.
England-ah Premier League hnuaiah Championship, League One leh League Two club an awm a. Hemi hnuai chin hi ‘Non-League’ club tiin an sawi \hin.
Heng hnuai chiahah National League a awm a, hemi hnuai lehah National League North leh South awmin hetah hian Kidderminster Harriers hi an khel.
Mipui 3,140 chauh \hut theihna Aggborough Stadium-ah Alex Penny chuan mualneitu tan minute 19-naah goal a khung a. Hei hi minute 91-naah Declan Rice-a’n sut hramin minute 121-naah Jarrod Bowen chuan chakna goal a khung hram.
Kidderminster hi hlawhtling nise English football chanchin a result inbarakhaihna lian ber a thleng ang.
Inkhel dangah Manchester City tan Riyad Mahrez chuan goal hnih a khung a, 4-1 in Fulham lakah awlsam takin an chak.