Senegal in an tum ram an thleng a, an ram chanchin a vawikhatna atan Africa Cup of Nations trophy an chawi.
Final inkhel hmuhnawmah Senegal hian Egypt an hmachhawn a, hun pangngai leh hun pek belhah te goal an khung loh ve ve hnuah penalty hmangin 4-2 in an chak.
Senegal tan star player Sadio Mane chuan an chakna penalty a khung a. Inkhel hun pangngaiah penalty an hmuh chu khung lo mahse boruak sang tak karah, a team tana pawimawh lai takah a chesual nawn lo.
Senegal goalkeeper Edouard Mendy chuan Mohanad Lasheen penalty pet a save bawk a. Olembe Stadium-ah Teranga Lions te lawmin an lam.
Senegal sual chhuah hnehna
Africa khawmualpui inelna lianah Senegal hi \um hnih final khel tawh an ni a, an hlawhtling lo ve ve. Tun \umah hian player malkhai a langsar tak tak an kawl nual a, an tan hun\ha a ni.
Chutihrualin an hma a ding hi AFCON chanchin a ram hlawhtling ber an ni a. Vawi sarih champion tawh Egypt niin an star player Mohamed Salah hovin rin loh an har.
Senegal in football hmuhnawm leh hlauhzawm zawk an khel a, hmatawngah Mane an dah an hmang thiam. Lehlamah Egypt in goal ven an dah pawimawh.
Minute 4-naah Fgypt centre-back Mohamed Abdelmonem chuan penalty a chawi a, hei hi Mane-a’n a pet. Mahse Egypt tan final kalkawng a penalty \um thum save tawh Gabaski chuan a dansak.
Senegal tlarhnung in Salah an veng hneh a, a team in na taka goal nawr aia fimkhur an thlan avangin chance \ha tak a nei tam lova, goal shot erawh vawi hnih a nei.
Second half-ah Egypt in Senegal ball inpe kual tur chhut chah tumin an khel a, hun pangngai tawp thleng an hlawhtling.
Extra time-ah erawh Senegal bawk langsar in Gabaski-a’n \um thum Senegal subsitute Baba Dieng lakah save \ha tak tak siamin a ram a chhanhim a. Hun pekbelh tawp dawnah Mendy-a’nMarwan Hamdy goal khung tur a dansak ve leh bawk a. Extra-time ah chak zawk nih tuma ram pahnih innawr a hmuhnawm.
Penalty an pet
Egypt hi final kalkawngah knockout inkhel an hmachhawn zawng zawnga extra-time khel vek niin Ivory Coast leh Cameroon te penalty hmanga hneh tawh an ni.
Tun \umah a pet goal lo hmasa zawkah \angin Mohamed Abdelmonem chuan goal ban a pet per a. Gabaski bawkin Bouna Sarr pet chu dang ve leh mahse Lasheen-a’n a pet goal loh hnuah Mane-a’n chakna penalty a khung a. Egypt thiampuipa Salah-a’n penalty hnuhnung ber pet tura khek a nih avangin a pet ve hma in an tlawm.
“Ka trophy chawi hlu ber”
Liverpool forward Mane chuan Africa Cup of Nations trophy a chawi chu a tana hlawhtlinna hlu ber a nih thu an champion hnuah a sawi.
“Ka hun tawn tawh zinga ropui ber a ni a, ka trophy chawi tawh zingah a la ropui ber.”
“Champions League leh trophy dangte ka lo chawi tawh hlawm a, mahse hei hi ka tan chuan a hlu. A dang zawng aiin ka ngai pawimawh zawk. Ka lawm a, ka chhungte zawng zawng leh ka hnampuite ka lawmpui.” tiin a lawmzia a sawi.
A penalty \helh hnua pet leh tura chakna petu chu a teammate-te an nih thu sawiin, “Penalty ka khung loh kha ka la na hle a, mahse ka teammate-ten ‘A huhovin kan chak a, a huho bawkin kan tlawm ang, Sadio kan tan thil ropui tak tak i ti tawh, hnual lovin i kal zel a \ul.’ min tih khan chakna min pe a, penalty hnuhnung zawk ka khung theih phah.” a ti bawk.