Tun hnaia chanchinbu thenkhat leh social media-ah November 25, 2021 zana Assam Chief Minister Himanta Biswa Sarma leh Mizoram Chief Minister Zoramthanga ten New Delhi-a zanriah kil ho chungchang Chief Minister’s Office (CMO)-in thuchhuah siamin a sawi fiah.
Nimina thuchhuah a siamah CMO hian, he zanriah hi Mizoram chief minister-in a buatsaih anga ziah a nih laiin Assam chief minister-in a buatsaih a nih zawk thu te, Assam CM sawmna angin New Delhi Assam House-ah zanriah hi Mizoram CM hian a va kilpui niin thuchhuahah a tar lang a. Hemi tum hian Chief Minister Zoramthanga hi Delhi Mizoram House Resident Commissioner te, Officer on Special Duty to CM leh Addl. PS to CM ten an tawiawm a. Anni bak hi hemi tum hian amah tawiawmtu an awm lo niin a tar lang bawk.
“Mizoram chief minister sawmna anga Abu Mazumdar-a’n a tawiawm tih hi thu belhchiandawl lo a ni a; ani hi Assam chief minister lamin an sawmna anga he dinner-ah hian lo tel ve a nih a rinawm,” tiin CMO thuchhuahah tar lan a ni.
MNF General Headquarters pawhin hemi chungchangah nimin khan thuchhuah an siam a. Mizoram chief minister Zoramthanga tawiawmtu zingah Assam police-ten kuhva tawlhru thin anga an rinhlelh mek, Abu Mazumdar-a a tel anga thu thehdarh a ni chu thudik tawk lo a nih thu an sawi a. Assam chief minister hian amah tawiawm turin Minister Atul Vora leh Abu Mazumdar te hi a sawm zawk an nih thu sawiin, “Abu Majumdar-a hian Assam CM hi New Delhi a thlen khalh a, Mizoram House-ah Pu Zoramthanga leh a tawiawmtute hi va hmu hmasain, anni hian Assam House-a thleng turin an lo kawhhmuh nghe nghe a, Assam House-ah hian Minister Atul Bora nen an thleng dun ta nghe nghe a ni,” an ti.
Zanriah kilhonaah pawh Abu Majumdar-a hi a tir lamah a lut ve mai nghal lo nghe nghe a, Assam CM hnenah, ‘I sawm a ni lo’m ni, pawnah a awm,’ an tih takah chauh Assam CM hian a koh luhtir tih hriat a nih thu sawiin, zanriah kilhonaa Mizoram Chief Minister Zoramthanga tawiawmtute hi OSD to CM Rosangzuala, Additional PS to CM Peter Sawmpuia leh Delhi Mizoram House Resident Commissioner Amjad Tak-te an ni a. Abu Majumdar-a hi Mizoram chief minister tawiawmtu zingah a tel loh thu MNF Gen Hqrs chuan thuchhuah siamin an tar lang a ni.