Assam Chief Minister Himanta Biswa Sarma chuan Thawhtanni khan coronavirus kaihhnaiha an state-a inkhuahkhirhna awm zawng zawng chu February 15 atang hian an phelh vek tawh dawn tih a puang.
Sarma chuan school board examination, municipal election leh Majuli assembly biala bye-election pawh thla hnih lo awm leh tur chhunga neih a nih tur thu a sawi bawk.
Bazarpui leh ennawm chhuahna zawng zawng chu dan pangngai angin hawn vek a ni ang a, zana curfew kalpui mek pawh hlih vek a ni ang a. Mo lawm pawh zan thlengin neih theih a ni ang a, a telte erawh invenna bikima la vek tawh an ni tur a ni thung tih Sarma chuan a sawi.
Sarma-a’n sorkar thutlukna siam thar a puan rual hian Class 10 leh 12 examination-a inlan turte chu Covid-19 vaccine la vek turin a ti bawk.
“February 15 atang hi chuan Assam-ah curfew a awm tawh lo vang a, Covid-19 inkhuahkhirhna zawng zawng pawh hlih vek a ni ang,” tiin chief minister hian Dispur-a thuthar lakhawmtute a kawmnaah a sawi a ni.
“Class 10 leh Class 12 examination-a inlan tur zawng zawngte chu vaccine la vek turin ka ngen bawk che u a ni,” a ti.
Chief minister chuan Guwahati Municipal Corporation leh Karbi Anglong Autonomous Council inthlan chu April thlaah municipal board dang inthlan ruala inthlan tur a nih thu a sawi bawk.
Hmarchhak state lian berah hian Covid-19 kai hi mi 7,21,380 hmuh chhuah tawh an ni a. Darkar 24 liam ta chhung khan mi 256-in an kai tih hmuh chhuah leh hman a ni.
Hri kai hmuh tawh zinga mi 7,05,118 chu enkawl dam tawh an ni a, mi 6,561-in an thihpui tawh a. Darkar 24 liam ta chhung khan mi 12-in an thihpui leh hman a ni.