Champhai district chhunga lirthei neituten vawiina Champhai Bawrhsap Maria CT Zuali duh lohna kawng zawh huaihawt an tum chu Champhai Sub Headquarters YMA ngenna angin an thulh rih.
Hemi chungchangah hian Champhai District Lirthei Inzawmkhawm Pawl (CPDLIP) chuan nimin khan thuchhuah siamin bawrhsap duh lohna kawng zawh an tum chu Champhai Sub-Headquarters YMA-in khawpui chhung veng hrang hrangte Covid-19 avanga red zone-a puan hial a ngaih avangin inhnuk hniam hret turin an ngen angin kawngzawh an tum chu an thulh tih an tar lang.
CPDLIP thuchhuah chuan thla thar, March 1-ah an hmalak zel dan tur ngaihtuahin thutkhawm an nei leh dawn tih an sawi a, an member zawng zawngte an thu leh hla lo ngaichang turin an ngen bawk.
Hetihlai hian Champhai Sub-Headquarters YMA hruaitute chuan boruak tha zawk a awm theihna turin CPDLIP chu kawng zawh an tum thulh turin an ngen tih Champhaia chanchinbumite an hrilh ve thung.
Champhai Sub-Headquarters YMA hruaitute chuan, “Hri leng vang lam ni lovin boruak tha zawk a awm theihna tura thulh turin kan ngen,” an ti bawk.