National Green Tribunal (NGT) Eastern one Bench, Kolkata-in tum hnih lai Chalfilh tlanga Vanzaua tourist destination thiat turin Mizoram sorkar a hriattir tawh hnuah thupek tidanglam turin Mizoram sorkarin NGT ngen leh a tum.
The Zozam Times zawhna chhangin Forest Minister TJ Lalnuntluanga chuan state sorkarin NGT thupek hi ngaihtuah that leh a nih theihna tura hmalakna tumna a neih mek thu a sawi.
TJ Lalnuntluanga chuan NGT thupek ang hian Chalfilh tlang Vanzaua tourist destination thiat tura sorkar a hriattir angin helai hmun thiat turin forest department an inrin tawh thu sawiin, “State sorkarin hemi chungchang hi ngaihtuah that leh a nih theih nan hmalak a tum avangin sawi thui theih a ni rih lo,” a ti.
Tar lan tawh thin angin NGT chuan November 17, 2021 khan Chalfilh tlanga Vanzau hmuna building sak leh kawng siamte tichhiaa thian fai tur leh tun hma lama a awm dan ang chiaha siam tha leh turin Mizoram sorkar a lo hriattir tawh.
Mizoram sorkar chuan NGT thupek hi tidanglam turin ngenna an thlen a, hei pawm loin kumin January 19 khan helai hmun hi May 17, 2022 hmaa thiat turin sorkar hi a hriattir nawn leh a ni.
Hetihlai hian a ram neitu nia inchhal, Khanpui khawtlang chuan VC & All NGO Coordination Committee dinin Chalfilh Tourist Destination hi thiah an phal loh thu leh thiat tura hmalakna a awm chuan dodal an tum tih an lo puang tawh bawk.