Chicago Bulls star DeMar DeRozan chuan a team tan hun pawimawha inkhel dah\hatu a nihna a tilang leh a. San Antonio Spurs lakah 120-109 a chakpuiin Bulls record thar a siam.
Thawhlehni zing inkhelah DeRozan hian point 40 a score a. A zawna inkhel vawi sarihah point 30 aia tam a score na niin hei hi professional basketball-ah point 30 a pelh zawn rei ber a ni a. Hei chauh hi ni lovin 1996-97 season a Bulls legend Michael Jordan-a’n a zawna game ruk chhung a lo tih tawh chu game khatin a khum.
Bulls hian khup na avangin an All-Star Zach LaVine chu a zawna match hnih nan an chhawr thei lova, a awm loh erawh an tuar lo.
Kum 32 mi DeRozan hian point 40 a score a\anga 19 hi fourth quarter-ah a score a ni a. Hnehna an chan chhan lian tak a ni.
Bulls hi fourth quarter an khelh \anin point 6 in an hniam zawk a. DeRozan leh Nikola Vucevic ten a tawp inkhel thunun hle in Spurs an lehthal hnuah a tawp thleng an sang zawk a. A zawn vawi li nan hnehna an chang.
“Boxing a knockout thei tak ang hi ka ni lo, mahse min hmachhawn a nih chuan in chau telh telh anga, a tawpah chak turin a \ul chen chen thlen ka inpeih.”
“Fourth quarter ah hi chuan chak tura tih ngai apiang tih ka inpeih a. A tir a\anga rik nghal pawp pawp hi thil awlsam a ni lova, chuvangin inkhel pumpui thlir thiam a ngai \hin.”
“Ngun taka inkhel thlir hi a ngai a. Thil engkim zirchian hnuah fourth quarter-ah duhtawka chet dan tir a hriat tawh \hin.” tiin DeRozan chuan inkhel zawhah a sawi.
Bulls tan Nikola Vucevic chuan point 25 leh rebound 16 a la a. Coby White chuan 3 pointer vawi 5 lutin point 24 a score.
Spurs hi match li a\anga vawi thum chak tawh niin inkhel \an mahse an chak zo ta lova. Lonnie Walker IV chuan point 21 score in All-Star Dejounte Murray chuan point 19 leh assist 11 a nei ve thung.
Chicago Bulls hi Eastern Conference-ah vawi 37 an chakna niin pahnihna an ni mek.
Nets tan Curry
Brooklyn Nets in a zawna vawi 11 an tlawm hnuah hnehna an chang a. An player lakluh thar Seth Curry chu an chakna hnar niin point 23 leh assist vawi 5 a nei.
Golden State Warriors star Stephen Curry-a nau Seth Curry hi Nets star player Kevin Durant leh Kyrie Irving te awm loh kara hmahruaitu a ni a. Ani bakah midang pali in point 10 aia tam an score.
Philadelphia 76ers a\anga Brooklyn pan ve All-Star Ben Simmons chu Nets hian an la chhawr thei lo bawk.
Sacramento Kings in a zawna vawi hnih an chak tawh chu an belh thei lova, De’Aaron Fox chuan point 26 a score.