BJP National secretary, minority morcha & Assam state incharge Delson Notlia leh BJP Mizoram state vice president Dr. BD. Chakma ten nimin khan Mizoram Larsap Haribabu khambhampati hmuin, tul leh pawimawh hrang hrang an sawipui.
BJP National secretary Delson Notlia chuan thlakhat chhung Mara autonomous district council huam chhunga khaw 46 a tlawh chungchang Larsap chu hrilhin, Siaha district-in harsatna an neihte a sawipui a. Central scheme hrang hrang chungchangte sawipuiin, SBI ATM booth leh branch dah belh tura hmalakpui turin a ngen bawk.
Larsap chuan Siaha district chu a ngaihpawimawh thu leh zankhat riaka a tlawh tawh thu sawiin, central scheme hrang hrang duh anga mipuiin an hre tawk lo pawi a tih thu leh Mizorama official concern department te pawh a sawipui tawh thu a sawi a. SBI ATM booth/branch dah belh chungchangah pawh hmalak a nih thu leh harsatna dang te pawh chinfel a nih theihna tura hma a lak tur thu a sawi.
BJP Mizoram state vice president Dr. BD Chakma pawhin Chakma autonomous district council (CADC) huam chhunga mipuiin harsatna hrang hrang an tawh te Larsap chu a sawipui a. Mizoram sorkarin suma inrenchem chhuanlama sorkar motor te ti tlema, sorkar hnathawk tur pawh pawimawh tak a nih loh chuan a lak loh laia CADC-a MNF kaihhruai sorkarin hnaruak thenkhat leh hnathar siam chawpa thawktu an lak thu leh hna lak an kalpui mek te tha lo a tih thu Larsap chu a hrilh a. CADC sorkarin sumah nasa taka harsatna a tawh avangin hna lak kalpui mek te chu a rang lama titawp turin Larsap chu a ngen a. Larsap chuan Dr BD Chakma ngenna te chu lo en zui ngei a tum thu a sawi a ni.