Aizawl: Supply Minister K Lalrinliana chuan Mizoram sorkarin Open Market Price-in Mizoram thar buhfai lei duh vek mah se lei tur an hmuh mang lo thu sawiin, “Kan ei tur buhfai kan la thar chhuak tlem lutuk hi a lungchhiat thlak,” a ti.
K Lalrinliana hian nimina NABARD loan hmanga a sak thar, Hmuifang leh Chhipphira buhfai kudam leh quarter a hawnnaah Mizorama thar buhfai lei tur an hmuh mang loh thu hi a sawi a. “Buhfai thar tamah tan lak a ngai,” tiin, buhfai thar tam chu rilrua dah len a ngai ta hle tih a sawi.
Supply Minister chuan buhfai an sem chhuah thin dan sawiin,”Thla tin Sawrkarin mipui hnenah buhfai quintal nuai 1 leh sang nga vel a sem thin a, BPL, AAY bakah Scheme dangte pawh a awm a, Open Market Price atangin engemaw zat kan lei bawk,” a ti.
Mizoram hmun tam taka kawng sial mek anih avangin kuminah chuan kum dang aia buhfai an chhek khawl thin aia tam dah a tul dawn tih sawiin, kudam 50 vela fur daih tur buhfai chhekkhawl thin chu kuminah chuan kudam 70 velah Monsoon Stock dah a ngai dawn tih leh hei hi dah mek a nih thu a sawi.
Oil leh gas mamawhna sang zel phuhruk nan Oil Depot hmun tur te leh LPG Bottling Plant tihlen te chu sokarin a ngai pawimawh thu Supply minister chuan sawi tel bawk.
Hmuifang Supply Centre-ah hian buhfai Metric Tonne 200 dah theihna Kudam bakah Store Keeper leh Chowkidar Quarters Building (chawng hnih) te leh Toilet Block te sak a ni a, a vaiin cheng nuai 140 bawr vel seng a sak a ni.
Chhipphir Supply Centre pawh hetiang tho a sak niin, a sakna man hi cheng nuai 156 vel a ni.
Supply Department hian Mizoram pumah Supply Centre 121 an nei mek a, chung zinga 21 chu sak that mek a ni a. Heng Kudam 21 sak that te zinga hawn hmasak ber chu nimina hawn Hmuifang Supply Centre a ni.
Supply Centre 21 te hi Babie Construction & Consultancy Services sak a ni a, a project pumpui hi cheng vaibelchhe 39.61 hu man a ni a. Kudam tam zawk chu March 2022 ral hmain sak zawh an beisei a ni.
Hmun hniha buhfai kudam hawnna hun hman hi Supply director Ramdinliani’n a kaihruai a, Aizawl South III bialtu MLA Dr. F Lalnunmawia leh Lunglei North bialtu MLA Dr. Vanlaltanpuia te an tel a ni.