Mizoram sorkara a nghet loa thawk, Provisional Employee mi 8,500 chuangin sorkara an thil phut tihhlawhtlin a la nih loh avanga lungawi lohna lantir nan nimin atang khan chawlh an la tan a. Department hrang hrang hnathawh a khaihlak phah nasa hle.
Provisional Employee’s Association of Mizoram (PEAM) hian an regular ve theihna tur, sorkarin sum renchemna, austerity measure changchawia a danna chu phelh turin an lo ngen tawh a, hemi bakah hian new pension scheme-a inziah luh ve an lo ngen tawh bawk.
Heng an thil phutte hi tihpuitlin a nih loh avangin February 15, 2022-a PEAM hruaitute thukhawm chuan February 17-18-ah lungawi lohna lantir nan mass casual leave lak an rel a, an thurel bawhzuiin nimin atang khan leave hi an la tan a ni.
The Zozam Times zawhna chhangin PEAM President Lalhruaitluanga Sailo chuan sorkar kar nana chawlh an lak chungchangah nimin khan PEAM hruaituten Addl. Chief Secretary an kawm thu sawiin, an inbiaknaah an lungawina khawp thu an hmuh loh avangin ro an lo rel tawh angin chawlh hi an la chhunzawm dawn tih a sawi.
Lalhruaitluanga Sailo chuan ni hnih chhung chawlh an lak hnuah pawh sorkar atanga chhanna an duh khawp an hmuh lo a nih chuan sorkar laka an lungawi lohna chu chhunzawm zel an tum thu The Zozam Times a hrilh bawk.
Nimin khan The Zozam Times-in Aizawl khawpui chhunga sorkar pisa hrang hrang a fang kual a, Provisional Employee zingah kal lui an awm lo niin department hotuten an sawi.
Department thenkhat hotute chuan an department-a thawktu zinga zaa 50 dawn chu a nghet loa chhawr, Provisional Employee an nih thu sawiin, heng mite hi an chhawr tangkai thute, an tel lo chuan hnathawh a mumal hleih theih loh thu an sawi bawk a ni.