Indian court chuan kum 2008-a Gujarat-a bomb puaka mawhphurtu mi 38-te chu thi turin a hrem.
Gujarat-a sumdawnna khawpui, Ahmedabad-a bomb eng emaw zat puakah hian mi 57 thiin mi 100 chuangin hliam an tuar bawk.
Ahmedabad court chuan mi dang 11 chu an dam chhung (an thih thleng) lung in tang turin a hrem bawk.
Hremna a pekte hi heng mite hian court sang zawkah an la thlen leh thei ang.
July 26, 2008 khan Ahmedabad-ah hian bomb 20 vel zet – mihring chenna hmunah te, bazarah te, vantlang inkalpawhnaah te leh damdawi inah te a puak a. Bomb thenkhat puak lo pawh hmun eng emaw zatah hmuh a ni bawk.
Indian Mujahideen, hetih hun laia hriat la hlawh ngai loh, Islamic hel pawl chuan chanchinbu thenkhatah email thawnin an tihah an chhal.
Indian sorkar chuan he pawl hi firfiak pawlah a puang zui a. Pune-a German bakery beihna, mi 17 thihnaah a mawhphurtu an nih zui leh bawk avangin kum 2010 khan an awm a khap (ban) zui ta bawk.
Ahmedabad-a bomb puakah hian mi 78 zet an chungthu relsak an ni a. A titua puh zinga pakhat, Ayaz Saiyed phei chuan a chhuitute chu a pui zui nghe nghe.
Mi 28 erawh chu inhnamhnawihna nei lova ngaiin chhuah an ni tawh.
An chungthu ngaihtuahnaah thuhretu 1,163 zet koh an ni tih The Indian Express chanchinbu chuan a tar lang.
Special Judge AR Patel chuan bomb puaka thi chhungte hnenah zangnadawmna Rs. 1,00,000 theuh pe turin a ti bawk.
Kum 2013 khan thuneitute chuan bomb puaka a titua an puh thenkhatte hian an tanna hnuai lei verha chhuah ruk an tum chu an lo man chhuak tawh bawk.