Formula 1 thuneitute chuan season liamta intlansiak hnuhnung ber Abu Dhabi Grand Prix a thil kalpui dan avangin nasa takin insiksawina an kalpui a. Race director Michael Masi chu an thlak.
Season hmasa intlansiak hnuhnung berah world championship inchuhna tihchian a ni a. Intlansiak a thil thleng leh thuneituten thil an kalpui dan avangin FIA lamin chhui chianna an kalpui a ngai a. FIA president Mohammed ben Sulayem chuan felfai zawka thil kalpui a nih tawh nan kalphung an thlak danglamte a puang.
Abu Dhabi a intlansiakah hian Masi-a’n intlansiak tawp dawn lama safety car tirhchhuah a nih chungchangah dan ang thlapin thil a kalpui lova, hei hian intlansiak result leh title inchuhna a nghawng thui hle tih FIA in an pawm.
Tun season a\angin race director hna hi mi pahnihin an inchhawk tawh dawn a, anmahni puitu tur official-te dah belh an ni bawk ang.
Race director thar turte hi – Eduardo Freitas leh Niels Wittich te an ni a. Freitas hi World Endurance Championship-ah race director ni reng tawh \hin a ni a. Wittich hi DTM German Touring Car Championship-ah race director a ni ve thung.
Anni pahnih hi FIA F1 director \hin Charlie Whiting hnuaia deputy race director ni tawh F1 veteran Herbie Blash chuan a pui ang.
Kum 2019 Formula 1 season \an dawna Whiting a thih avanga race director hna chelhtu Masi hi FIA chhungah tho hna dang a chelh ve thung dawn tih Ben Sulayem chuan a sawi.
Masi thlak bakah hian race control leh team-te inbiakna kalpui dan thlak a ni a. Team-ten zawhna an neih an zawh theih laiin a baka race director an biak pawh phal a ni tawh lo bawk.