Mizoram Rayja Sabha MP K Vanlalvena chuan Chuhvel khaw daia ramri vengtu awmna, Mizoram police duty post a tlawh a, duty post panna kawnga luite pahnih lei dawh thatna tur MP LAD fund atanga pek ngei a tum thu a sawi.
May 30, 2021 khan John Haliday-a’n a huan, Chuhvel leh Saikhawthlir ram chhunga a thlam sak mek, Assam police-in kalchilha sak chhunzawm tawh lo tura an tihbuaina kal zelah ramri veng tura Mizoram sorkarin Mizoram police duty post a siam tharte chu K Vanlalvena, hian Nilaini khan tlawhin an dinhmunte a enfiah a ni.
Mizoram MP (RS) hian Google Map imaginary boundary line behchhana Assam-in an ram nia an chhalah Mizoram sorkarin police duty post a siam thar chu chhinchhiahtlak tak a tih thu te, police duty post tur building panga sak thar tura Mizoram sorkarin tender a chhuah mek thu te, a panna kawng tha zawk siam tura inbuatsaihna te, solar light sorkarin a lo dahte chu lawmawm a tih thu leh thlamuan thlak a tih thute a sawi.
Mizoram police duty post panna kawnga luite pahnih lirtheiin pawhin a zawh kai theihna tur atan lei dawh thatna tur pawh MP LAD Fund neih hunah pek ngei a tum thu a sawi bawk.
K Vanlalvena hi Chuhvel VCP leh khawtlang hruaitute bakah Police Post Commander Inspector B. Lalnunsanga leh MNF party unit hruaituten an lo dawngsawng a ni.
Helai hmuna Mizoram police duty post pahnihah ramri vengtu police 37 rual an duty mek a ni.