Mizoram state sorkarin thingtlang hmasawnna tura central scheme leh programme a tihchingpen dante chu Mizoram larsap leh union rural revelopment minister hnenah an thlen tur thu Mizoram BJP Central Scheme Monitoring & Vigilance Cell chuan an sawi.
Nimina Aizawl Press Club-a thu thar thehdarhtute an kawm a, F Lalremsangi, Vice President, CSM&VC chuan Mizoram sorkarin thingtlang mipuite dawmkanna scheme, MGNREGS chungchanga central sum sanction Mizoram state sorkarin a hman ral danah thil dik lote a hmu chiang hle thu a sawi a. Mizoram sorkar kalphung dik lo, thuneihna hmang sualtute hrem an nih theih nan Mizoram larsap hnenah high level enquiry din tura an thlen tawh thu leh, union minister-in ngai pawimawha a chah angin hma an lak zel tur thu a sawi.
Sorkar laipuiin thingtlang mipuite dawmkan nan MGNREG Act 2005 a siam chu Mizoram State Employment Guarantee Council Body siam a nih dan atang hian MGNREG Act bawhchhiat nghal a nih thu sawiin F Lalremsangi hian, “State MGNREGS chungchanga thuneitu sang ber, Mizoram State Employment Guarantee Council-ah hian mipui lam non-official-te 15 aia tam lo tel tura tih niin, chumi zingah chuan hmun thuma thena hmun khat hmeichhia an ni tur tih pawh tun thlengin tihpuitlin a la ni lo a. Hmeichhe chanvo member panga hi ruat fel nghal turin Mizoram sorkar kan phut a ni,” a ti.
F Lalremsangi hian central sorkarin MGNREGS funding thuah state tin sorkarten an dil ang zelin sum a pe tih a sawi a. February 11, 2019 khan MGNREG Act 2005-in State Employment Guarantee Council body tura a duan ni lo State Employment Guarantee Council phuahchawp tak an thutkhawm thu leh, an thurel chu ‘mipui inhlawhna (Wage Component) leh Material Component 60:40 ratio ni rawh se,’ tih niin, “MC work-ah hian 40% District (DEC) thuneihna, 30% Block (BEC) thuneihna, 30% Village (VEC) thuneihna a siam ve ringawt hi MGNREG Act kalh a ni a, thuneihna hmansualna nasa tak leh eirukna khurpui ruahmanna a ni,” a ti bawk.
MNF sorkarin MC sum leh pai a hman ral dan hi district level leh block level-ah meeting-a ngaihtuahna awm hauh loin cheng nuaih sing tam tak hman ral a nih tawh thu sawiin, heng MC pawisa hmang hian ruling party headquarter mi invulh nan an hman thu leh thingtlang mite chanvo liau liau khawpui miin chhuhsakna a nih thu a sawi a. Hetiang ruahmanna state sorkar meuhin a siam hi central RD minister pawhin mak a tih thu a sawi a ni.