SHC sorkar paih thla, OSD to CM a inrawlh ngei niin hria


Sinlung Hills council (SHC)-a MNF member pathum leh independent member pathumten Nilaini khan Sinlung Hills Council-a HPC leh MNF tangdun sorkar an rintawk lohna an thehlut a. He motion chungchangah hian nimin chawhnu dar 1 khan special session koh niin, SHC-a sorkar dinglai chu paih thlak a ni.
Thudawnnain a sawi danin special session hi chawpchilh taka koh niin, Dy. Chairman Vanlalsiamsanga’n a kaihhruai a. Sorkar ding laia MNF thawhpui HPC member-te chu session tan hun hma lawka hriattir chauh an ni.
HPC member-te chuan special session chu koh a nih pawhin SHC hmunpui, Sakawrdai-ah ngei koh an phut a, special session-ah pawh hian an tel lova sorkar rintawk lohna motion thehluttu member-te chauh telin, an motion thehluh pawh chu anmahniin an pawm ta nia thudawn a ni.
SHC sorkar rintawk lohna hi MNF MLA pathum hriatpuia thehluh a nih laiin SHC-a HPC thawhpui MNF party hruaitute erawhin an hriatpui lo thung nia thudawn a ni a. A hriatpuitu MLA nia sawi pakhat chuan hemi chungchang hi a hriat ve loh thu The Zozam Times a hrilh bawk.
SHC-a MNF member, SHC Chairman Lalmalsawma Darngawn pawhin SHC sorkar rintawk lohna thehluh chu a hriat ve loh thu The Zozam Times a hrilh a. Thudawnna pakhat chuan SHC sorkar rintawk lohna thehluttuten an rintawk loh chhan tak an ziak lang lo niin a sawi.
SHC sorkar rintawk lohna thehluh chungchangah hian nimin khan HPC member-ten thuthar thehdarhtute kawmin SHC sorkar rintawk lohna thehluh chungchangah OST to CM, Mizoram Rosangzuala chu a inrawlh ngei nia an hriat thu leh SHC chungchangah inrawlh tawh lo tura an hriattir thu an sawi a. Special session pawh koh a nih chuan SHC hmunpui Sakawrdaiah ngei koh an phut thu an sawi.
HPC member-te chuan he thil thleng chungchangah hian Mizoram State Legislative Assembly Speaker Lalrinliana Sailo pawh a inrawlh nia sawiin, special session ko turin na takin SHC chairman pawh a nawr niin an sawi a. Hei pawh hi tha an tih loh thu an sawi bawk.
The Zozam Times zawhna chhangin HPC hruaitute chuan Sakawrdaia Sinlung Hills Council administrative building sak mek chu Kamrul Chhangte tia hriat lar mek, KR Constructions neitu hminga sak a nih thu an sawi a, “SHC administrative building sak turah Kamrul-a a inrawlh lehzel hi kan duh lo,” an ti bawk.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427