Ruah sur nasa tak avanga Brazilian khawpui pakhat, Petrópolis-a tui lian leh nasa taka lei a min hnu ni li-ah pawh chin hriat lohva awmte zawn hna chu ruah la sur zui reng avangin thawh chak hleihtheih a la ni lo.
Emergency team chuan Inrinni pawh khan ruah sur nasa lutuk avangin an hna thawk thei lovin an chawl zing hle a. Tunah chuan dam hmuh an inbeiseina pawh a chhe tawh hle tih an sawi.
Petrópolis khawpuia chhiatna thlengah hian thuneitute chuan mi 146 an thi a, heng zinga 27 hi naupang leh tleirawl an ni a, mi 191-te chin an la hre lo mek tih an sawi.
Mi 900 chuang chu sikul leh tawmhulna tur dang ruahmanah an la khawsa mek.
Inrinni khan hnathawktute chuan suahdur leh bawngtuthlawh hmangin chhum zing nasa tak karah in chim leh chirh an hai a. Mahnia inpe tam takin an pui bawk.
Lei min leh in chim kara tangte hi kut hmanrua leh thingzaina hmanga zawn an ni ber a. ui fing 41 rawih an ni bawk.
“Khawl lian thawh chhuahpui theih a ni lo,” tiin fire department’s special rescue group-a co-ordinator Roberto Amaral chuan AFP news agency a hrilh a. “Fanghmir ang maiin, a tahtawl zelin kan thawk a ni,” a ti.
A tuar na ber vengah chuan tlang awih panga chenna in 80 vel chu lei minin a hnawl a. Pathianni pawh khan mi 400 chuangin in chim leh bawlhhlawh senghawi hna thawkin thawktute hi an pui.
Thawhlehnia ruah nasa tak sur kha February thla puma ruahtui an dawn zat thin aia tam mah niin Rio de Janeiro hmar lam, khualzinte tlawh nasat tak khawpuiah hian lei a timinin tui a tilian nasa hle.
President Jair Bolsonaro chuan Zirtawpni khan chhiatna thlenna hmunte hi a tlawh a, khawpui chuan chhiatna nasa tak tawkin ‘indona rapthlak tak hnuhma ang mai’ niin a sawi.