Bibhu Prakash Swain-a chu hmeichhia 18 zet nupuiah a nei tawh a, India hmun hrang hrangah niin nupui dang pahnih nei leh mai tura a inbuatsaih mek laiin man a ni.
Kum 67 mi ni tawh hian marriage website-ah a kawppui tur zawngin kum 51 mi doctor, professor, lawyer, damdawi lam thiamna sang nei leh paramilitary officer ang ten a inzuar kual thin niin police chuan an sawi.
Pa tha tak, hlawh pawh tha tawk anga insawiin identification card leh appointment letter siamin an chhungkaw nihna pawh tha tak angin a tar lang thin bawk.
“Nupui a nei teuh hi an pawisa a duh vang leh mipat hmeichhiatna thil vang chauh a ni,” tiin police thuneitu sang, Sanjiv Satpathy chuan AFP a hrilh.
Satpathy-a leh a thuihhruaite chuan Swain-a hi hun eng emaw chen an zui hnuah tun hnai khan an man a. A nihna nia a insawi hrang hrang te, bank account bakah February leh March-a nupui neih leh a tumte an hai chhuak.
Satpathy chuan, “Hmeichhiaah pawp nula, hmeithai leh pasal then tawh, tlema hausa deuh, kum 50 hnaih deuh zel a bitum,” a ti.
An inneih hlim ni reilo te chauh a awmpui thin niin police chuan an sawi a. A nupuite chu eng emaw chhuanlam siamin an pawisa emaw, an tlereuh emaw hmansak/puksakin a kalsan leh daih thin niin an sawi bawk.
A chhuitute chuan Swain-a hian nupui vawi 18 vel tal nei tawh angin an ngai a. A mobile phone an ensak chuan a nupuite hming hi Madam Delhi, Madam Assam leh Madam UP tih ten, an awmna hmun azirin a lo dah hlawm a ni.
May, 2021 khan a nupui zinga pakhat, kum 48 mi chuan an inneiha a tlansan hnuah a hmain nupui pasarih vel a lo nei tawh a, a tlan bo leh thin tih a hriat avangin police hnenah a thlen a, an chhui ta ngar ngar a ni.
Odisha-a thingtlang khuaa piang, Swain-a hian a nupui hmasa ber chu kum 1978 khan neiin fa pathum an nei a. Pahnih hi doctor niin pakhat chu dentist a ni.
Lab technician niin a nupui fanaute a chhuahsan hnuah Bhubaneshwar-ah kalin doctor angin a inchhal tan a, kum 2002 khan a nupui pahnihna, doctor a nei.
Nupui tam tak neia a kalsan leh chhung hian bank account 13 vel khawih chingpenin Rs. Vaibelchhe khat vel a ruksak a. Credit card lem 128 zet a nei hman a. Hmun hrang hrangah medical lab dinin a doctor leh thawktu chhawr tam zawk chu hlawh la lovin rei tak a awmtir thin.