Tonga ram chuan chawlhkar nga liam taa tuipui chhunga tlangkang avanga an internet lakluhna hrui a chah avanga biakpawh theih loh chu zawm fel niin khawvel dang nen an inbepawp beleh thei ta.
Pacific thliarkar ram hian January 15 khan lirnghing leh tsunami tuarin chhiatna pawh a thleng nasa hle a, mi pathum thiin chenna in za tel a chhia.
Tuipui hnuaia an kaltir hrui chu chat bawkin ram pawn lam atanga biakpawh theih loh an ni.
Satellite service siamchawp hungin hemi hmang chauh hian biakpawh theih an ni.
Tlang a kan atanga chawlhkar khat hnu velah ram pawn lam atanga puihna leh an mamawh thleng tanin internet pawh tihnun a ni a; mahse, dan pangngaia chak erawh a ni lo.
Km 840 zeta thui, tuipui chhunga Tonga leh Fiji inkara cable an kaltir chauh chu a hma zawnga internet an lakna awmchhun a ni.
Thawhlehni chawhnu lamah khan telecommunications provider lian ber pahnih, Digicel leh TCC chuan an internet chu a nun leh tak thu an puang ta a ni.
Thliarkar ramah hian cable chat leh chhia a la tam em em tho va, hei vang hian dan pangngai ang ni tur chuan hna thawh tur erawh a la awm nual thung.
Social media-ah Tongan tam tak chuan an online leh theih tawh thu leh an chhung leh thiante awlsam zawka an biak leh theih thu an tar lang hlawm.
“Kan online veleh thei ta hi ka hlim hle a ni,” tiin Tongan Prime Minister Hu’akavemeiliku Siaosi Sovaleni chuan Australian Broadcasting Corporation a hrilh.
“Satellite hmangin kan ti ve thei na a, tuna cable ngei hmanga thlunzawm nen chuan inthlau tak a ni a,” a ti.
Hiroshima-a nuclear bomb thlak aia thawk na tlangkang puak khan internet cable km 80-a thui a tichhia a. A siam that nana an inbeisei aia ni 10-a rei thawkin tihthat theih a ni.
Tongan sorkar chuan tlangkang kha an ram mipui 85% zetin an tuar niin an sawi a, an khawpui leh hmun dang tam tak chu meivapin khuhin tui thianghlim in tur a vâng hle niin a sawi.
Prime Minister Hu’akavemeiliku Siaosi Sovaleni chuan an ram mipuite chu tun thlenga hlauhnain a la tuam thu kar hmasa khan a sawi a. In chhiate chu thla thar atanga an din thar tur thu leh tunah chuan hlauhna la awm chuan a la chim thu a sawi.