Central YMA hruaituten nimin khan Adviser to Chief Minister Technical, Er. K.Lalsawmvela chu a pisaah an kawm a, PMGSY hnuaia kawng sial mek zawh hun tawha la zawh fel lohte siam zawh fel vat a nih theih nana hma la turin an ngen.
An inkawmhonaah hian Er K Lalsawmvela hi PWD Chief Engineer Er. Bowman leh Er. David Sapzova, SE ten an tawiawm a. Central YMA hruaitute chuan PMGSY hnuaia kawng sial mek zawh hun tawha zawh fel lohte leh hnathawh tha lote chungchang sawiin, hna zawh huna la zawh lohte zawh fel a nih thuai theih nana hma la turte, hnathawk turin contractor hnathawk thei ngei hmang thin tura hma la turin Er K Lalsawmvela hi an ngen a ni.
Central YMA hruaitute leh PWD hotute thukhawm chuan mipuite dikna chanvo, kawngpui tha neih a nih ngei theih nan hmalakho zel an rem ti a, tun hnaia PMGSY hmanga kawng siam mek Khawzawl – Ngaizawl kawng pawh a rang thei ang bera thawh chhunzawm a nih theih nan ruahmanna siam a ni bawk.
Nimin vek khan Central hruaitute leh All Mizoram Cement & Iron Rod Dealers’ Association chu YMA Office-ah an inkawm a, Mizoram chhunga hnam dang, Mizo hming hawha iron rod, cement leh balu zuarte chungchang an sawiho.
Pawl pahnih thukhawm chuan Mizo hming hawha sumdawngte dapchhuah kawngah thawhho zel tha an ti. He huna an tarlan danin, tun dihmunah AMC area chhungah Mizo hming hawha heng bungraw zuar hi dawr 85 an awm mek a ni.