Chelsea in UEFA Champions League round of 16 a Lille nena an inkhel first leg an thunun a. 2-0 in an mualah hnehna changin dinhmun \ha zawkah an inhlangkai.
Stamford Bridge-ah Blues tan inkhel bul a \an vawi 50-naah Kai Havertz chuan minute 8 chiah goal khung turin a mamawh a. Hakim Ziyech corner a\angin goal hmahruai a khung.
Second half-ah inkhel dah\ha turin N’Golo Kante thawhrah a\angin Christain Pulisic chuan an goal hnihna a khung a. Second leg la hmabak mahse Blues dinhmun a \ha hle.
Chelsea hian striker manto Romelu Lukaku chu tunhnaiah a chet fuh hleihtheih loh avangin substitute bench-ah an \huttir a. Havertz hi hmatawngah dahin German international hian goal a khung nawn teuh hle.
Blues tana chanchin lawmawm lo erawh tunhnaia che \ha Ziyech leh midfielder Mateo Kovacic te nhliam a ni a. League Cup final a Liverpool hmachhawn tur club in kartawp hma in player te an inkhelh theih hram an beisei mek.
A lai an khauh
Chelsea khingpui Lille hi player tlanchak leh thawkrim rual nei an ni a, France lama team hmuhnawm an ni. Mahse Blues in an lakah buaina an tawk tam lova, heta mawhphurtu ber chu veteran defender Thiago Silva leh muallai luahtu Kante te an ni.
Kum 37 mi a ni tawh chungin Silva in a vanglaia khawvela defender \ha ber a mi tam takin an chhal \hin chhan a lantir a. A tawnhriat chhawrin an khingpui hlauhawm siam tur a lo thlirlawk thiam a, a \ul hunah a che a la muang miah lo bawk.
Ani in a hnung lam a kaihruai \ha a, an hmaah Kante-a’n a la danglam lo tih lantirin a taihmakna leh finna Chelsea in an chhawr.
France midfielder hian Blues tlarhnung leh midfield-ah a awl lai apiang a hnawhkhat a, chu chauh ni lovin an goal nawrah a bul \antu a ni fova. Pulisic goal khung tura ball a tlan luhpui in player theihna nei kim a nihzia a lantir.
A hmalamah erawh club chanchin a player manto ber Pound maktaduai 97.5 man Lukaku in asawi a hlawh a. Kartawp a Crystal Palace an hneh \um a ball vawi 7 chiah khawih Belgian striker hi \huttir a ni.
A aia khel Havertz-a’n team in a mamawh ang tak football a khel a. Goal a khung bakah a finna leh a ke a\anga ball chhuakin an goal nawr a ti na zual a. Coach Thomas Tuchel-a’n substitution a siam pawhin Lukaku ni lovin Timo Werner zawk a dah lut.
Tuchel a lawm
Chelsea boss Thomas Tuchel chuan, “Inkhel hautakah kan khawng a, team anga kan thawhrim avangin chak kan phu. Team \ha an ni a, chance kan neih tam tir lo kha sawi hmaih theih a ni lo.” a ti a. A player inhliamte chungchang sawiin, “Mateo kha halftime khan la chhuak ila \ha tur a ni a, Hakim chungchang hi doctor ka zawt tawh a, a nat lutuk loh kan beisei.”
“Thawhlehni a ni a, Pathianni nena a inkarah ni engemaw zah a la awm a, an inpeih hman ka beisei.” a ti.