Juventus striker thar Dusan Vlahovic chuan UEFA Champions League record a siam a. European football a club inelna lian ber a vawikhat inkhelhna a goal khung rang ber nimahsela a team in an hmahruaina an hum zo lova, 1-1 in Villarreal nen an inhnehtawk.
Estadio de la Cerámica-ah kum 22 mi hian inkhel \an a\anga second 32 chhungin goal a khung a. Danilo ball vawrh luh chu la in rang taka insiamrem in goal-ah a khung.
Pound maktaduai 58 a Fiorentina a\anga thla hmasa a an lei Serbian striker palian hi tunhnai thla 18 chhunga Europe a striker che \ha berte zing ami a ni a. Europe inelna lian berah a zam lo a ni tih a lantir nghal.
Goal an chhuah hnuah Villarreal in na zawkin goal an nawr a, Juve lam an inveng. Spanish team tan Giovani lo Celso chuan goal ban a pet per a, second half-ah Dani Parejo chuan vengtu a neih loh remchangah la in Etienne Capoue ball siamsak goal-ah a khung.
Juve in an ti fuh lo
Massimiliano Allegri pawlte hian goal an khung hnuah goal ven an dah pawimawh zawka, a tawpah dinhmun \ha a an din tawhna an hloh.
Goal an khung hnuah tlarhnungah panga inremin an khel a, Villarreal hi hun tam zawk chu veng thei mahse goal khung tur awm anga football khel zawk chu mualneitu lam an ni a. Wojciech Szczesny chuan Arnaut Danjuma goal khung tur a dang hram.
A tawpah Italian club in an tihsual an tuar a, Adrien Rabiot chuan Parejo tlan lut chu umzui lovin ani an ven theih loh avangin goal an chhuah.
Rabiot hi a inkhel tluan thei a vannei a, minute 73-naah Samuel Chukwueze hlauhawm taka a tlawh avangin yellow card chauh a hmu chu a vannei hle.
Bianconeri lungngaihna belhchhah turin an midfielder Weston McKennie chu second half-ah lakchhuah a ngai a. A hliam hi nimin khan endik niin a kephah ruh a tliak a, thum tham tal chawl tura ngaih a ni.
Mawi vak lova chak ka thlang zawk
Juve inveng lutuk chungchang chu coach Allegri chuan zawhna chhangin, “Kan inkhelh dan kha tun \umah chuan khatianga khelh kha kan mamawh. A laiah na taka min nawr an tum avangin a sir lamah ball kan kal tir nasat kha a \ul. Mahse football mawi khelh kan tum luatah kan tisual a, chakna goal kan mamawh hnuah kan sual chhuak leh thei tawh lo.”
“Duhdan a inang lova, mahse kei chuan hnehna chang \hin Juventus hmuh ka duh a, a mawi leh mawi lovah ka buai lem lo.” tiin a sawi.
Goal khungtu Vlahovic chuan, “Juventus a ka duhthusam chu a tak ram a chang a, mahse hnehna kan chan loh avangin ka lawm em em lo. Chak kan duh a, kan ti thei lova, hmalam pana kan insiam\hat a ngai.” tiin inkhel zawhah a sawi ve bawk.