- Rinfela Zadeng
Kan thupui hi – Mizo te chauh hi Sex Video siam thin hnam kan ni e – tihna ni loin, Kristian kan nihna leh kan hnam tlem te hi hnam zahawm leh Pathian thu atanga ‘sex’ hi inzirtir nawn kan ngaihzia kan sawi tumna a ni a. Miin lungngaihna leh zahna vawrtawp an tawh laia heti anga sawi zui a ngai hi a hrehawm a; mahse Pathian thu atanga inzirtir kan mamawh zia ti langtu a nih avangin inthiam lo tak chungin kan thiam tawk tlemte hmangin kan sawi dawn a ni.
Sex hi Pathian siam a ni
Gensis 1:28-na kan chhiar chuan Pathianin nupa hmasa ber Adama leh Evi chu malsawmin chi tam tak thlaha lo punga leilung luahkhat turin thu a pe tih kan hmu. Hetah hian Pathianin Adama leh Evi te chu ‘sex’ hmanga chi tam tak thlah turin a siam tih kan hmu a. Sex hi a tir atang rengin Pathianin hmeichhia leh mipa inkarah, nupa inkarah chi thlahna tur atana a siam a ni a, Pathianin sex hi hmang turin mihringte min siam a, chi thlahna tur atan sex hi Pathianin a siam a ni. Hebrai 13:4-a kan hmuh angina nupui pasala innei si loa hman te, nupa ni si loa nawmchenna atana hman te leh uirena te erawh chu sual, tisa leh thlaraua thihna khawp sual a ni a; Kohhran pawhin chu chu kan inzirtirna a ni bawk.
Mizo nun hlui leh Sex
Kan pi leh pute hun lai atangin tlangval nula ngai thei nih kha an tum a ni a, nula zen zauh pawh an ching tih kan hmu. Mipain hmeichhia a mutpui theih chuan inchhuannah a ngai a, a thiante bulah a sawi chhuak thin. Tin, nula thianghlim pahnih pathum a ngai thei a nih chuan a thih hnuah mitthi kawtchhuahah Pawla’n sairawkherhin a sai dawn lo niin an ngai a, nula thianghlim pawh Pawla hian a perh ngai lo bawk niin an ngai a nih kha. Chutiang chuan kan Mizo nun hluiah sakhuana leh sex chuan inzawmna thuk tak a nei tih kan hmu. Hetianga rin dan leh ngaihdan hi nei mahse ualau tak leh pawlawh takin kan pi leh pute kha sex lamah an nung zui lo tih erawh chu kan hre vek awm e.
Hmeichhiate leh Sex Video
Kohhran leh Bible atangin nupa karah lo chuan sex hi hman loh tur, sual a ni e – tiin kum za chuang kan inzirtir tawh a, khawvel mipui leh Mizo te ngei pawhin sex hi kan la hmang sual zel a, a pawi hle. Sex kan lo hmang ta a nih pawhin video hi siam tawh suh u. A bik takin hmeichhe tan phei chuan a mualphothlak em em a; kan dam chhunga kan thih phah hialna khawpa sual leh thil pawi a ni. Sex-ah i insum zo ngang loa, i bialpa emaw i pasal emaw mipa tu nen emaw sex in lo hmang a nih pawhin video-in lak tir tawh suh. Sex hman laia video-a lak kher phuttu mipa chu kalsan ngam la, i dam chhungin i inchhir ngai lo ang. Sex hman hrim hrim pawh i tan sual a ni tawh a, i video a ‘viral’ zui a nih phei chuan Mizoram-ah hi i tan chuan hremhmun a ni tawh tih i hriat kha. Nula te u, fing teh u, fing mawlh teh u. I pasal tan chauh i kapkar kha vawng him la, i thei ngang lo a nih pawhin video chuan lak tir tawh lul suh!
Mipa te hi
Mipa tan chuan sex kan hmanpui theih nula chu kan ngainep thin a, intihtheihna atan kan hmang zui thin. Tun hma chuan tawngkain kan thiante kan hrilh a, tunah chuan video hmangin kan puang zar a, kan hmeichhiate kan va timualpho tak em! Kan duh tawka nawm kan chenpui hi duh tawk ila, video hmang hian kan hmeichhe mutpui te khawvel hi i tihchhiatsak tawh lo hram ang u. Hmeichhe lungmawl zawk leh awmnem zawk, min rin tawk avang leh min hmangaih avanga kan tana an engkim hlan an ni a, tihmualpho zui kher hi kan tluang thei ngai lo ang. I bula tenawm taka a khawsaknaah lungawi la, mi zawng zawng hmuh tir kher kha tum tawh suh. Sex i hmanpui kha sual a ni tawh a, video i vawrh darh sak leh phei hi chuan an nunna hial laksak tluk i ni a, tualthat tluk i ni asin! Hmeichhia avanga lo piang kan ni a, sex kan hmanpui theih avanga ngainep tur kan ni lo. Hmeichhe zahawmna humhim turin Pathianin mipaah a siam che a, sex i hmanpuina video vawrh dah turin a siam lo che.
Saruak Pathian
I saruakna video avanga hawi ngaihna reng reng hre loa beidawng tak leh inchhir taka i awm mek lai hian, nangmah ngaihdama hmangaihtu che Lal Isua Krista chu saruak vekin Kraws-ah i tana thiin a tho a, a ngaidam che. I sualna avanga saruak mualpho tawpa i awmna chu saruaka Kraws lera mualpho ve tho Lal Isua chuan a ngaidam che a, a kuangkuah che a, chatuana nunna a pe che. Saruaka mualpho chu saruaka mualpho ve thoin a ngaidam che a, chatuan nunna kawr tharin i saruak chu a khuh a ni tih hre reng ang che. Sex hi nupa nih hnuah chiah hman tur a nih zia chiang taka hretu i nih angin mi dangte pawh zirtir ang che.