Premier League hmahruaitu umtu Liverpool in Manchester City nena an inkar chu point thum chauh ni tawh turin an tihniam a. Nilaini zanah Leeds United an sawp.
Anfield mipui thawm \ha tak hmaah Liverpool hian 6-0 in an khingpuite hi an hneh a. A zawna vawi rukna atan Premier League hnehna an chang.
Team hlauhawm ber?
Pathanni a Carabao Cup final khel tur Jurgen Klopp-a pawlten duhthusamin inbuatsaihna inkhel nia ngaih theih an khel a. First half-ah minute 20 chhungin goal thum an khung a. Second half tawp dawn lamah Leeds an nghaisa nawn leh.
Reds hian goal 70 khung tawhin Premier League a goal khung hnem ber an ni a. Manchester City aiin goal difference-ah an sang zawk bawk.
Mohamed Salah chuan minute 15-na leh 35-naah Stuart Dallas handball leh Luke Ayling foul avanga penalty an hmuhte a khung a. Hemi inkarah Joel Matip chuan goal khat a khung.
Second half-ah Sadio Mane chuan minute 80-na leh 90-naah goal khungin huntawp hma in Virgil van Dijk chuan goal khat dang a la khung ve leh hman.
Premier League a goal khung tam lamah a sang patuhm chu Liverpool player vek an ni a. Salah-a’n 19 khungin Diogo Jota leh Sadio Mane ten goal 12 leh 11 an khung.
Midang khung tur siamsak lamah pawh a sang pathum chu Liverpool vek an ni a, Trent Alexander-Arnold leh Mohamed Salah ten goal 10 ve ve an siamsak tawh a, Andrew Robertson chuan goal 9 a siamsak bawk.
Manchester City hi January 15 khan Liverpool lakah point 14 in an sang zawk a, Premier League title inchuhna a tawpah mi tam takin an ngai. Nimahsela tunhnaiah Liverpool in an hma a dingte hneh takin an hnawl zel a, khelh 12 lai la awmah an inkar a tlem tawh hle.
“Kan chak vek a ngai”
An manager Jurgen Klopp erawh a la \awng fimkhur hle a, “Tunah point thum a ni a, mahse kartawp a thleng anga, City an chak ngei anga, point ruk a ni leh ang. Kan inkhel hmabak zawng zawngah kan chak vek a nih chuan kan tan kawng a la inhawng.”
“Midang tan chuan point thum leka inthlauh hi thil engkim tingaihnawm tu a ni a, mahse keini tan erawh team \ha tak tak kan la hmachhawn dawn a, hengte hi kan hneh vek a ngaih avangin a awlsam dawn lo.” a ti.