Ukraine buaina: Indian hruai haw dan enpui turin minister pali chhuak


Russia-in Ukraine a rûn mek avanga Indian hruai tangkhangte hruai haw hna thawh mekah a buaipui turin minister pali tirh chhuah an ni.
Heng minister-te hi Ukraine thenawm ramah tirh an ni a. Ukraine-in an ram chung boruakah thlawhna thlawh a phal loh avanga a thenawm ram atanga thlawh chhuah a ngaih avangin heng ramte dawr kual tur hian Prime Minister Narendra Modi chuan Thawhtanni khan a minister-te a tir ta a ni.
“Union minister – Jyotiraditya Scindia, Hardeep Puri, Kiren Rijiju leh General (retired) VK Singh te chuan Ukraine thenawm ram panin India zirlai leh mi dangte hruai haw hna thawh mek an enpui dawn a. Minister-te hi India tana palai hna thawk angin an zin ang,” tiin sorkar hotu pakhat chuan a sawi.
Scindia hi Romania leh Moldova lam chang tura tih a ni a. Rijiju hian Slovakia a pan a. Puri-a’n Hungary panin Gen Singh chuan Poland atanga hruai haw hna thawh a vil thung ang.
India hian Ukraine-a a mite la tangte chu a thenawmah tlan lut phawt tur leh chuta tanga anmahni hruai haw turin ruahmanna a siam a ni.
Modi-a hian Thawhtanni tuk khan Indian hruai haw hna thawh chungchangah hian thutkhawm hmanhmawh a ko va. Hetah hian a minister-te tirh chhuah tur hian thu an titlu.
Pathianni khan Modi-a hian Foreign Minister S Jaishankar leh sorkar hotu liante chu darkar hnih chuang a lo kawm tawh bawk a. Hetah hian Modi chuan Indian zirlaite himna leh hruai haw chu an ngaih pawimawh ber a nih thu a sawi a. New Delhi-in Ukraine thenawm ramte chu a hna thawh tur atana biakpawh dan turte pawh an sawiho.
Minister-te ram palai anga a thawn tur thu puan hi Ukraine ramri kân tum zirlaite leh ramria duty-te inkara inhmuh thiam lohna deuh a awm tih social media-a video thehdarh a nih hnu lawka puan a ni.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427