India ramah Congress party engtinnge ni zel ang?
Tun hnaia India ram state thenkhat inthlanah Congress party dinhmun a hniam zel a, sorkar na siam theihna hmun an nei meuh ta lo. Ram pumpui thlir phei chuan an dinhmun hi a khirh chho hlein a lang a, Lok Sabha inthlan a hnai leh uar tawh bawk nen, rorellai BJP leh a sangawizawnpuite ho hian rorelna fawng an chelh leh mai lovang tih a sawi theih loh bawk.
Heti em em maia state hrang hrang inthlana an inkhaichhuak zo lo chho hi ngun takin an ngaihtuah chho ve ngei ang a, an thochhuak leh thei em ang chu maw? Kan state-ah ngei pawh rorelna an chang zo tawh lo a, an thatna thin leh ro an la rel ngar ngarna Punjab-ah AAP in an luah lan leh ta bawk.
Kan ramah pawh MNF leh Congress tia kan sawi fo thin chu kiang ve zelin, ZPM an rawn in la vung chho a, kan rorelna in sangah phei chuan ZPM zawk hi eptu party lian leh seat ngah zawk an ni ta der mai. Hetih lai hian a hruaitu lawk lam inthiarfihlim hmasaah Congress hi tangin, Pu Hawla ni lovin president post dinhmun a luah chho ta bawk a, party dang an buai chhoh laiin fel takin an lo inrem diam thei tawh bawk lai hi a ngaihnawmna tur a la ni leh ngei pawhin a rinawm.
ZPM party leader Pu Lalduhoma phei chuan tun hnaia a thusawina pakhatah Congress party chu an zinga tel ve mai tawh turin a sawm hial a, he game hian eng tak thleng chho ang i maw? Heti tak maia ram puma an buaina hi engtinnge kan rama mite hian an lo hmachhawnin, nakum MLA inthlanah engtia rawn chet nge an tum ang tih chu mi tam tak thlir leh, hriat chak a ni bawk.
Kan rama party liante chet dan leh thawm neih dante hi thalaiten an thlir reng a, suma lei theih loh an la awm teuh tih hrereng a, hmasawn zawnga ram siamthat tum an awm zel kan beisei bawk e.