Aizawl: Mizoram Mistiri Association (MMA) chuan Lengpui Airport chei thar mek slab chim chhanah contractor emaw, supervisor-in emaw mawh a phur niin an ngai.
MMA hruaitute chuan Inrinni khan Lengpui Airport chei thar mek slab chim chu tlawhin an enfiah a, he hnathawh danah hian mistiri chu thawktu pawimawh tak ni mah se, contractor emaw, supervisor emawin mawh an phur hle nia an hriat thu an sawi.
Hnathawh dan an enfiahah in rel chim chu rod zawm dan leh cement proportion a dik tawk lo va, tui a mamawh ang an pe lo nia an hriat thu leh chu chuan concrete chakna tam tak a tichhia tih sawiin, “A ban leh beam, slab tlo dan tur angin a tlo dawn lo tih a chiang sa,” an ti.
MMA thuchhuah chuan, Terminal Building kawta kawng chhawng tur an siam mek pawh a structure a dik tawk lo nia an hriat thu sawiin, Mizoram chhunga construction hnathawh reng rengah contractor emaw a hna viltu, supervisor ten hlep nasat tumna avanga hmanraw hman chhiat leh, hna uluk lo tak mistiri an thawhtir thin chu pawi an tih thu an sawi.
Mistiri-te pawh an hnathawhna theuhah mahni sahimna ngai pawimawh turin an ngen tih MMA thuchhuah chuan an tar lang.