AZL: Congress \halai, MPYCC chuan Lengpui Airport building chei \hat lai chim chungchanga a mawhphurtu chhui chiang turin nimin khan Lokayukta Mizoram Chairperson C Lalsawta hnenah FIR/complaint an thehlut.
Lokayukta-a FIR/complaint an thehluhah hian, ‘Lengpui Airport Renovation tur atan contract award dan leh Lengpui Airport renovation chim chungchang chhui tura ngenna,’ tiin, FIR thehluhah hian point pahnih an ziak a ni.
MPYCC President Dr. Lalmalsawma chuan Lokayukta lama an FIR thehluh chungchangah, “Vanduaithlak takin March 10, 2022 Zirtawpni tlai dar 4:30 vel khan airport renovation tur a hna an thawh mek chu slab an chhun laiin a chim a, a beam leh bante tliak rem rumin a chhe hneh hle a ni. Vanneihthlakin mihring nunna chân a awm lo hlauh a, a hmun ngeiah pawl hrang hrangten an tlawh hnuah contractor-in a hna a thawh dan (sub-standard) a \ha tawk lo tih chu a hmawrbawkna a ni,” a ti.
Lengpui Airport renovation hna thawk tura contractor thlan an nih danah sawi neuh neuh a tam tih sawiin, “Budget-ah a pawisa tur sanction awm hma hauh leh work order pawh a chhuah hmain thla eng emaw zat contractor-in hna an thawk lawk tawh tih te sawi zel a ni,” tiin, thil felhlel a tamin, ei rukna thuk takin a inrawlh ngei nia rin theih avangte leh, tuna hna an thawh tawhte pawh a quality te, an hna thawh dan leh hmanrua an hman dan te Lokayukta hian chhui chiansak turin an ngen tih a sawi.
Congress \halaiin aviation-a sum chingpen chungchangah Lokayukta-ah complaint a thehluh pawh CBI chhui tur turin tih ni mah se, MNF sorkarin a dang riha hriat a nih thu an sawi a. Chhui puitling ngei turin Lokayukta-in CBI koh luh a rawt ngei angin sorkar hian ko lut ngei turin an phut nawn thu an sawi bawk.
Lok Ayukta Chairperson C. Lalsawta chuan complaint lo dawngin, ‘man power’ a neih tlemzia leh hna thawh tak tak a harsatzia MPYCC-te lo hrilhin, hna an thawh theih tak tak nana tun aia thuam chak an ngaihzia a lo sawi bawk. Case dangah pawh CBI koh luh tur an tih ngei pawh sorkarin a koh luh duh miau loh avanga harsatna an tawh thu a sawi niin MPYCC hian an sawi a ni.