Chelsea in huntawp dawnah goal ‘cial’ an khung a. Newcastle United nen an inhnehtawk dawn nia a lanlaiin an mamawh goal an khung a, 1-0 in an chak.
Blues hi an club neitu Roman Abramovich chu UK sorkar in a chunga hrekna a kalpui hnuah Stamford Bridge-ah a vawikhatna atan an inkhel a. Team pahnihte an inhnehtawk mai dawn nia a lan tawh hnuah minute 88-naah Blues tan Kai Havertz a ke veilam a mawi taka ball ‘control’ in laklawh awm miah lovin Martin Dubravka sirah a pet lut.
Goal an khung hma in Chelsea an bil a, Newcastle United in goal ven tum a inremin minute 75 an khelh chhungin Blues hian goal-ah ‘shot’ an nei miah lo.
Magpies pawhin goal hlauhawm an nei tam lova, an midfielder Miguel Almiron chuan yard 25 a hla a\anga a pet chu Chelsea goalkeeper Edouard Mendy chuan a dansak a. Dan Burn-a’n hun\ha a neih goal sirah chiah a tauh bawk.
Mikhual team hian inkhel tawp dawna goal khungtu Havertz chu first half-ah red card pek a phu hle niin an ngai a. Boruaka ball tauh tura an zuannaah Burn hi a kiu in a hmaiah a nghawk a. Referee erawhin yellow card bak a phawrh lo.
Chelsea manager Thomas Tuchel chuan an inkhel thlirletin, “Fiahna tam tak kan paltlang a ngai a, chance insiam a harsa a, a rei telh telh khan an khel\ha ve telh telh a, chuvangin goal kan chhuah loh kha a pawimawh a ni.” a ti a.
Club hma hun zawhna chhangin, “Thil thar han sawi tur vak a awm lova, mahse club inleichhawnna \ha taka a kaltluan theih ka beisei. Lungkham lian tak nei chi ka ni lem lova, Stamford Bridge leh Cobham a mi zawng zawngte tan boruak zangkhai zawk kan siam hi a pawimawh.” a ti ve bawk.
UCL khelh tum Arsenal
Arsenal chu Premier League-ah a sang pali zinga inhlangkai leh turin an chak a. Pathianni zan inkhel hnuhnungah Leicester City 2-0 in an hneh.
Emirates Stadium-ah Gunners tan Thomas Partey leh Alexandre Lacazette ten goal an khung a. Tunhnaia che \ha tak Arsenal hi a zawnin vawi nga an chak tawh.
Minute 11-naah Gabriel Martinelli corner pet chu vengtu nei lo Partey chuan a tauh lut a. A thlengtu lamin inkhel thunun hgle in Partey hian cross bar a pet per bawk.
Lehlamah an goalkeeper Aaron Ramsdale chuan save \ha vawi hnih Harvey Barnes laka a siam ve a ngai a, mahse minute 59-naah Leicester defender Caglar Soyuncu handball avangin penalty a\angin Lacazette chuan an chakna tichiang turin goal a khung.
1998-99 season a\anga chhiarin Gunners hi Champions League-ah a zawna season 19 khel thei an ni a. An coach Mikel Arteta chuan an club chu Europe club inelna lian khel ngei tlak an nih thu a sawi.
“Kan tel ve ngei tur a ni a, kan tel pawh a ngai. Kan club chanchin en hian tel lo thei kan ni lo. Tunah erawh kan tel dawn tihna hun a la ni lova, khelh tur hmabak kan la ngah.”
“He club-ah hian mi \ha tak tak, kan thil tum a chiang tak kan kawl hlawm a, khelmual chhunga kan chetdante result-ah kan chantir a pawimawh a. Tunhnaiah result \ha kan neih kan kaltluan tir thei a ni.” tiin a sawi.