Armed Veng nula, Ronia tia a hming lem vuah pawngsuala vautua puh, Suresh Chandra Meena, Rajasthan mi, Mizorama hnathawk chu dan ang taka a chunga rorel phutin hmeichhe pawl hrang hrang leh khuaikhem tawktu lainattute nimin khan Vanapa Hall kawtah an pungkhawm.
February 28, 2022 zan khan Suresh Chandra Meena hian Kendriya Vidyalaya, Tanhrila a thawhpui, Gorkhali nula chu hruai chhuakin a pawngsual bakah sawisain, mi dang bula a sawi chhuah chuan thah hialah a vau niin puh a ni a, Suresh-a hi police-ten an man tawh a, thubuai siamsakin bail a dil mek nia hriat a ni.
Pawngsual duh lohzia lantirna Vanapa Hall kawta huaihawtah hian MSU hruaitute, veng hrang hranga Gorkha association leh Aizawl khawpui chhunga MHIP branch thenkhat hruaitute telin, pawngsual an duh lohzia leh hmeichhe pawisawi lo, khuaikhemtu na taka hrem an phut thu te, bail a dilna phalsak lo tur leh a thawhna sikula thuneitute chu bân nghal tura an phutna thu inziahna placard-te an keng a ni.