Thalaite nun leh inngaihzawnna khawvel

  • Lalruattluangi, Govt. Hrangbana College

Pathian hian Mihringte hi chi tam tak a inthlah pung a, he khawvel luah khat tur hian min ti a, chu a thuthlung ang ngei chuan Mihringte hi Mipa-ah leh Hmeichhia ah min siam a, kan inkarah in hip tawnna lian tak dah in, nupa ah kan lo insiam ta \hin a ni. Nupa a insiam tur chuan mipa leh hmeichhia a inhip tawnna a dah chuan min inngaihzawn tir ta \hin a, chu mipa leh hmeichhe inkar a inngaihzawnna awm, in hip tawnna chu kan han sawi ho dawn a ni a, sawi dan kawng hrang hrang leh thlirna tlang hrang hrang a awm thei a, inngaihzawnna nun \halaite khawvel bik kan chhui dawn ani.
|halai kan nih chhung hi a rei lo em em a, mahse Mihring kan nih chhung a kan hringnun zinkawng nawm hun lai ber, kan \hat leh chak vanglai ber,kawng tinreng a kan hringnun a a ber kan hauh lai hun anih avang hian a nuam bik em em a, khawvel hi a par \hin a ni. Mahse a ral zung zung a, kan Pathian thu Bible pawn, “|halaite u, in \hat lai chen ula,in la naupang viau lai hian hlim rawh u……..Engmah engto nei suh ula,in pang tinatu awm hek suh se, in \hat lai hun a rei dawn lo (Thuhriltu 11:10,11)ah a lo ti a, Pathian thu ang zawng pawn kan \hatlai hun kan chen hi a thiang a, mahse kan chunga roreltu Pathian a awm tih erawh kan hriat fo a ngai thung.
Hmanlai kan pi leh pu te hun han thlir let pawh hian inngaihzawnna la na tak tak sawi tur an awm a, Pasal\ha a\ang a hnamchawm nula leh tlangval thlengin, Sailo lal fanu leh Lal fapa thlengin, inngaihzawnna hian nula leh tlangval, \halai te ah hmun a luah thuk a, fam chan huam mai ni lo, fam chang ta pawh sawi tur an kat nuk a ni. Lianchhiari pawh a ngaihzawng Chawngfianga a ngaih em avang a a thlir \hin thu te, a thlirna hmun lah tun hnu zel a kan historical place lar tak te zinga pakhat a lo ni chhunzawm ta hial a, Zawlpala leh Tualvungi thawnthu a\ang ringawt pawh inngaihzawnna, in hip tawnna hi Mihringte nun a a thukzia leh pawimawh zia a lang chiang hle. Hla thu \ha tak tak a lo chhuah phah bawk a, chuvangin inngaihzawnna hi keini mihringte hian kan hlamchhiah in kan kalpah ngawt hi a dik lo a, luh chilh a zir bing hi a \ul tak zet a ni.
Kan tunlai \halaite khawvel hi kan chhui zau ber tur leh kan thupui pawhin sawi a tum ber a ni a, ni mi pangngai chin a ruk tal a ngaihzawn ruk nei lo kan awm chu a rinawm chiah loh. |halaite lo pawh chhia leh \ha hre chin tleirawl tir, nu leh pa, pi tar pu tar, naupang chenin, mahse kan thlur bing tur chu \halai te nun bik a ni. Ni e, ngaihzawng neih chu thiang a ni, tupawn hmel\ha tih zawngte, duh zawngte, ngainat zawng te kan nei vek a, kan thlirna tlang a dang in a in ang lo mai zawk a ni. Inngaihzawnna chu mi 2 inkar a lo piang a, in duh tawn em em in engkim an ti dun \hin a, ni e neih fuh te chuan ngaihzawng neih te chu nuam deuh asin.
Mahse tunlai \halai te hian ngaihzawng kan neih dan leh kan ngaihzawng te nen a kan in zui dan hi a dik lo deuh tawh a, ngaihzawng neih kan thiam lo kan ti dawn nge kan thiam ta mah mah zawk ni dawn ni. Nuthlawi leh Pathlawi kan tam ta lutuk ta, naupang nu leh pa kar a seilian thei lo kan pung tulh tulh bawk, a pawi hle a ni. A chhan chu inngaihzawnna kawng a kan fimkhur loh rah a ni. Chu chuan kan ram mai bakah kan mizo na a nghawng buai kan ti lo thei lo, tleirawl/rawlthar \ha kan vang telh telh bawk, a chhan chu a hun hma a kan ngaihzawngte nen sex kan hman vang a ni. Naupang nu leh pa kar a seilian thei lo inngaihzawnna kawng zawh dik loh avang a piang te hian kawng \ha an zawh zel chu beisei awm hek lo i, ngati nge aw inngaihzawnna hian mipat hmeichhiatna hi ken tel tir kan tum tak tlat ni, inngaihzawn avang a sex hman ngei ngei tur emaw kan ti ta hian inngaihzawnna thianghlim hming a ti hliau a, a pawi tak zet, ka \hiante min fuih ve na kha ka la hre reng a ka vawng a, ka nun khalh ngil tu atan ka hmang bawk, thingtlang mi kan ni a, lo nei a \hianho inlawm kual \hin kan ni, ka lawm te hi mipa vek an ni a, “|hiannu nang chu mipa ten an duh duh a an tihkual theih in awm suh, tumah i chung a in sawi thei tur an awm loh nan fimkhur ang che, mipa te hian kan duh ang tawk a inngaihzawn lai a kan tihkual theih chu nupui atan kan duh tak tak lo, duh pawh ni ila rilru a hmin zan thei tawh lo \hin, kan thil tawn kan sawi te a\ang hian in vawng tak in awm ang che” tiin, ni e, an awmkhawm tawh chuan an in sawitheih siak emaw tih mai tur an ni \hin, mipa te ka ring chhe lam ni lo in, sawi sel ka tumna che u ni loin, mipa zawng zawng in in ang vek ka tihna lah a ni lo, ka sawi chhan leh tum zawk tak chu,h meichhia i ngaihzawn lai a\anga i duh ang ang a i awm pui theih chu i nupui duh tak ah pawh lo chantir ta la, hmun hla tak a rei tak awmbo san dawn ta la ngaihngam takin thlamuang takin i awmbo san thei ang em? Tin, hmeichhia te pawh fimkhur kan ngaihna lai tak a ni tih hriat reng tur, kan kawppui kan nupui pasal an nih hnu ah thlamuang tak leh ngaih \ha tak a kan siam theih nan chuan inngaihzawnna hun a\ang a kan nun kan uluk a \ul a ni.
Chutiang a inngaihzawnna, nawmchen nan leh taksa hlim hlawp nan a hmang \hin te chu an in hmangaih tak tak thei lo kan tihna ani hauh lo, mahse chutiang a inngaihzawn ai chuan thianghlim leh dik tak, mawi tak a inngaihzawnna hian hlimna leh thlamuanna a lo pai ru hnem zawk daih, tisa hlimna mai piahlamah thlarau lam thlengin a hahdam \hin. |hian tam tak ka nei a, ka rualpui te te mipa leh hmeichhia te an ni, inngaihzawnna khawvel a an thil tawn tam tak min share \hin a, a changin an hlim em em a a changin an \ap a rilru na tak a an awm chang lah bo lo. Ni e khawvel a ni miau a, mahse an thil tawn te a\ang chuan kei hian intiamna ka lo nei ta a, chu chu inngaihzawnna kawng an zawh sual avang a ka \hiante rum vawng vawngna te, an \ah zawih zawihna te chu pumpelh ka tum a kum 20 ka nih in ngaihzawng ka nei ve ta a, mahse ka intiam ang ngeiin fianrial hun kan neih apiangin \awng\ai dun ka rawt a, fianrial hun kan ngah leh \awng\ai tam a Bible chhiar chu kan hunnhman dan a ni. A chang chuan a ning \hin viau a, min ngaihnep chang pawh a awm ang mahse tun thleng hian ka ngaihtuah let pawn ngaihzawng ka neihna khawvel ah hian rum vawng vawng na tur emaw inchhir ngawih ngawih na thil ka neih awm hi ka la hre hauh lo, chu chuan min ti confi em em a ni.
Inngaihzawnna dik tak chu a mawi a, a rinawm a, a nuam a, a thlamuan thlak bawk \hin. Tin, dik tak a inngaihzawnna chuan Nuthlawi leh Pathlawi tam ta lutuk pawh hi a ti hniam ngei ang, ni e a dik alawm ngah nge a tlak hniam loh tehlul ang ni, naupang te te Sawrkar dan chu sawi loh, Kohhran pawh in a puitling a a la chhiar mang lo ten sawn an pawm ta nawlh nawlh a, sawn an lo thlak bawk a, a hman hmanin sex hi an lo hmang ta mai emaw tih turin a result thla hnih thum hnuah a rawn lang chhuak mai \hin si a, a pawi tak zet zet \hin a ni. Inngaihzawnna kawng kan zawh sual nasat vang a thleng a ni a, dik tak a inngaihzawnna khawvel hmang ni hlawm ila chu a tam zawk chu kan pumpelh ngei ang, hetiang a naupang te te ten inngaihzawnna khawvel kan dai sual nasa ta lutuk hi engvang nge niang aw tiin ka in zawt fo \hin. Inzirtirna kan nei ngai lo nge, nu leh pa te hian helam kawngah hian kan fa te kan zilhin kan fuih ngai lo zawk niang aw!? Ka causin pakhat hi kum 17 mi a nih in sawn a pawm a, a nu leh pa te chu an zak ngei mai, a zirna zawng zawng a chhunzawm thei si lo, Anu in ka bula a sawi chu “Naupang te ka nih hi pasal ka nei a, mite’n a Nu a chhun a nih saw ti a an sawi tur hi pawi ka ti ber” a ti vawng vawng, ni e mahni fa te zilh a, hau ngam a, fuih tur pawh hian ka nun in a zir a ngai a, kan nun in a zir miau loh chuan fa te ngei ngei pawh kan zilh in kan fuih tim \hin, fa ten “Nang pawh eng nge i nih bik” an tih let vaih che chuan i nunah entawn tur \ha i tuh si loh chuan i hawi hil viau tur asin, chuvangin inngaihzawn lai a\angin fimkhur la, in sum thei la, a hun hma chuan sex hman loh hram i tum dawn nia.
Ngaihzawng neih hi sual a ni lo, hringnun kalsiam ti kim tu, Pathian thu ang zawng tak pawh a Pathian thu em em a ni. Ngaihzawng neih hlawkpui em em an awm rualin,c hhiatpui an awm ve tho bawk a,k a \hianpa pakhat chu a bialnu kha a chhungten an duh pui loh em avangin \hen turin an ti a, a la na teh asin. In a\ang in a tlan bo a, ruihhlo bawih ah a tlu lut a, insual te a ching a, a hma zawng a kohhran leh khawtlang tan a mi \angkai tak mai, kha ti khawp a a ngaihzawng vang a a tla chhe ta kha a pawi zia hi ka sawi thiam lo zawk a ni, a pawi lutuk tih mai loh chu, mahse a dem awm hran lo e, a ngaihzawng nen a in zawmna kha a thuk tawh viau pawh a ni mah na. Kum a liam a a inhmuh chhuah meuh chuan a pawi zo tawh, miten a chungah ngaihdan an lo siam fel vek tawh, a pawi a tih ber chu a ngaihzawng a \hen kha a ni lo, a lo la na a a lo tuar ve vak kha a in chhir leh em em a ni. Kan sawi tum tak zawk chu chhungte phalna thlap a ngaihzawng neih nawm bik tur zia hi a ni, inhmangaihna chu sawi loh in duhna ringawt pawh hian mit hi a lo ti del thei khawp mai a, ngaihzawng kan neih chhan ber pakhat chu kan kawppui tur kan zawnna hmanrua a ni a, mi \ha lo kan nupui pasal an nih hnu a kan inchhir na leh ngei ngei tur te pawh keini mit ah chuan kan hmu mam vek a, mahse min hmangaih a kan hma lo ngai tu kan nu leh pa te mit erawh a lo fim kar \hin, chuvangin chhungte phalna thlapin ngaihzawng nei ila, a him a a tlo nge nge bawk, tih hi vawng reng ang u.
Ka \halai pui te u hei hi i ngaihtuah tlang teh ang u, i kawppui, kan ngaihzawng nen khan eng ang inngaihzawnna khawvel nge in chen mek kha, mite hmuh pui leh hriatpui tlak a ni chiah em? In in zui rei tawh emaw rei lo emaw in in zui chinah inchhir vawng vawng na tur thil thleng in hmachhawn tawh em? A lo thleng tawh anih pawnin lo dai pelh tawh a nih pawhin hun \ha chu tunah in tan a in hawng a ni tih hria ula, inngaihzawnna thianghlim siam tur in hun \ha in a lo nghak che u a, in la tlai lo a, in tun hun kha a pawimawh ber a ni tih hria ula, han in siam \ha ula, khawvel thar chu siam ula, miten lo dem che u pawh ni se i ngaihzawng nen in khawvel a \hat a Pathian hriat pui tlak anih chuan chhungril hlimna leh thlamuan ruk na chu i nei dawn tho tho a ni. Pathian hian sual sim te hi a lawm a lawm em em chu mi fel sa te ai mah in, chuvangin kan tih sual a\ang a kan in siam \hat na khan inngaihzawnna khawvel thianghlim a siam thei che u tih hre reng ang che u. Tin, chutiang a i lo la dai pelh ve lo anih pawh in huaisen takin chhel takin mahni in vawng takin hma lam pan zel la, i ngaihzawngin thlemin nawr \hin che mahse kawng dik leh inngaihzawnna thianghlim neih pui a kawh hmuh tu zawkah \an tum tlat la, chu chuan in inkar pawh a aia thuk in a siam ngei ang,
Mahni chan tawka lungawi thei lo mihring te hi mi khawngaih thlak tak an ni a, chutiang mi chuan khawi hmunah mah hlimna an hmu ngai lo. Mahni chan tawk a lungawi lo a, mi inkar a tlakzeh tum tawk lah kan bo lo, chutiang mi te chuan mi nupa inkar te, mi inngaihzawng inkar te an tibuai a, mahse hlimna an hmu chuang lo, luck ber leh \ha ta ber emaw an in ti a, mahse an hnung lamah miten an nuih ru a, an ngainep ngawih ngawih tih reng lah an hre si lo.
Engpawh chu ni se, i ngaihzawng nen in inkarah Pathian lal ber sela, zawldawh leh dawhthei takin, inhrethiam tawn tak in, inngaihzawnna thianghlim tak kawng chu zawhin, tawpna hlimawm a inngaihzawhna zinkawng chu khar ngei turin fimkhur tlang ila, kan ngaihzawng nen a kan inkar a\ang hian miten Lal Isua hmel lo hmu thei ngei sela, mite entawn tlak leh inzirna atan a an lo hman theih zawk nan inngaihzawnna khawvel hi fimkhur tak leh \ha takin hlim tak in i hmang zel ang u.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427