Union Home Minister Amit Shah chuan thla tharah hian Meghalaya khawpui, Shillong a tlawh dawn a, hetah hian hmarchhaka state pariat chief minister-te a hmu vek dawn nia sawi a ni.
Home Minister Shah hi Shillong-ah hian ni hnih a châm ang.
Shah-an hmarchhak state a tlawh tur hi Assam Chief Minister Himanta Biswa Sarma chuan nimin khan New Delhi-ah a sawi.
“Home Minister Shah chuan July hian Meghalaya a tlawh a beiseiawm a. Shillong-ah ni hnih a cham dawn a, thil erawh la tihfel vek a ni lo,” a ti.
Shah-an Shillong a tlawh huna hmarchhak chief minister-te a kawmnaah hian helai biala thil hrang hrang an sawiho vang.
“Thil hrang hrang – dan lova ramria ruihhlova sumdawnna te, hmarchhak state-te inkara ramri buai te pawh home minister hian chief minister-te a sawipui dawn a ni,” tiin Assam Chief Minister Sarma chuan a sawi.
Assam chief minister hian nimina New Delhi-a thuthar lakhawmtute a kawmnaah hmarchhak state-te chu ‘seven sisters’ an tih zinga mi vek an nih thu a sawi.
“Seven sisters kan ni a, lehlamah kawng hrang hrangin keimahni \heuh tan kan bei bawk a. Heng keimahnia kan beihna hi kan buaina a ni lo va, unau vek kan ni zawk a ni,” a ti.